Komishanka
Doorashooyinka Qaranka oo Cayimay Maalinta
Diiwaan gelintu Ka Bilaabmayso Hargeysa
Komishanka Doorashooyinka Qaranka
iyo Axsaabta Siyaasada ayaa kulan Shalay galab ay ku yeesheen
Xarunta Komishanka waxa iskula qaateen in Diiwaan galintii Gobolka
Hargeisa la bilaabo 1-da Bisha December ee fooda inagu soo haysa,
isla markaana 25 Bisha November 26, 27 ka Tababaradii Shaqaalaha
hawsha qabanaya la fidiyo halka 28 iyo 29 Bisha November Komishanku
ay ku diyaarinayaan agabka hawsha lagu fulinayo.
Kulankaas ay Asxaabata iyo Koomishanku isla qaateen waxa kale oo
lagu go’aamiyay in diiwaan-galinta Gobolka Hargeysa ay socoto ilaa
Sideeda Fiidnimo si labada Saacadood ee Habeen walba dheeradka
noqonayaa ay u noqoto maalin dheeraad ah oo ka badan maalmihii 6 da
ahaa ee Gobolada loogu talo galay baaxada Gobolka Dadka ku dhaqan
awgeed.
Hawsha Diiwan-galinta ayaa la filayaa in ay 1-da Bishaasi dib u
bilaabanto iyada oo ay duruufo badani ku soo baxeen habsami u
socodkii markii hore loogu talo galay oo wakhti badani ku lumay,
sidoo kale dib u bilaabista hawsha diiwan galinta Gobolka Hargeysa
ayaa lagu wadaa ka hor in uu Dalka dib ugu soo laabto qaybtii ugu
muhiim sanayd Qalabka diiwan galinta lagu qabanayo oo ku maqan Dalka
Kenya kaas oo lagu soo shubayo barogaraamkii kala saari lahaa dadka
ku noq noqda Diiwaan-galinta oo Shaqaalahii Hindida ahaa ee Aqoonta
u lahaa Dalka ka baxeen Qaraxyadii ka dhacay Hargeysa isla markaana
Shaqaale cusub lagu soo tababarayo.
Dhinaca kalena waxa wali ku gedaaman habsami u socodkii hawlaha
diiwaan galinta cabashooyin badan oo ka taagan Shaqaalahii ka soo
shaqeeyay Labada Gobol ee Awdal iyo Saaxil kuwaas oo Qaarkood Shalay
hor tageen Golaha Wakiilada si ay mudanayaasha ka soo jeeda
Goboladooda ugu gudbiyaan dhibaatooyinka haysta, halka ay kooxo
kalena ay wali ka hortumanyahiin Komishanka Doorashooyinka.
Cabashooyinkaas ayaa inta badan waxa ay Shaqaaluhu sabab uga
dhigayaan Qaabka ay masuuliyiinta Komishanku u maamulayeen Nidaamka
Shaqo oo ay sheegeen in aanu waayo aragnimo ku dhisnayn isla markaan
lahayn Qorshe Fur furan
Dhinaca kale Komishanka Doorashooyinka ayaa xalay soo saaray
ogaysiis ku saabsan diiwaan-galinta cod-bixiyayaasha iyo goorta ay
blaabmayso waxaanu u qornaa sidan:
“In kastoo ay ina hakisay dhacdadii weerarka ahayd ee 29-kii
October, haddana diiwaan-galinta cod-bixiyayaashu way socotaa.
Khubaradii farsamo yaqaanada ahaa waxay ku hawlan yihiin inay
diyaariyaan habkii diiwaan-galinta ee loo waajihi lahaa gobolka
Maroodi-jeex (Hargeysa).
Sidaa darteed guddida doorashooyinka qaranku waxay ogaysiinayaan in
shaqaalihii la tababarayay ay yimaadaan jaamacada Hargeysa maalinta
Salaasada ee taariikhdu tahay 25/11/08 todobada subaxnimo (7:00am).
Diiwaan-galintu waxay ka bilaabmi doontaa Maroodi-jeex maalinta
Isniinta ee bishuna tahay 01/12/08 waxaanay soconaysaa lix cisho oo
ku eeg maalinta Sabtida.
Waxay guddida doorashooyinku dadwaynaha ogaysiinayaan in tirooyinka
hordhaca ah ee iska diiwaan-galiyay gobolada Saaxil iyo Awdal ay
yihiin sida soo socota:
gobolka Saaxil-------------------------- 51,538
gobolka Awdal------------------------- 133,864
Haddaba, nidaamkii lagu ogaanayay qofka mar labaad is
diiwaan-galiyay shaqadiisu way socotaa marka taasi dhamaato guddida
doorashooyinku waxay soo saari doonaan tiradda kama dambaysta ah.
Gudoomiyaha guddida Doorashooyinka
Mudane Maxamed Ismaaciil Maxamed
|