Khudbadii Cabdiraxmaan Tuur Ee
18 May 1991
 

Isniinta ay maalin kali ahi inaga xigto, waxay ku beegan-tahay siddeed iyo toban sano guuradii ka soo wareegtay la soo noqoshada madaxbanaanida Jamhuuriyada Somaliland oo magaallada Burco lagaga dhawaaqay bishii May 18-keedii 1991-kii.

Islamarkaana Madaxweyne iyo Madaxweyne Ku xigeen loogu doortay Cabdiraxmaan Axmed Cali iyo Xassan Ciise Jaamac oo ahaa gudoomiye iyo gudoomiye ku xigeenkii Ururkii SNM ee hormuudka ka ahaa hal-gankii dib u xoraynta dalka.

Munaasibadan oo sanad kasta la xuso, waxa ka muuqda gobolada dalka, guud ahaan daafaha dunidana ka socda diyaar-garow loogu jiro dabbaal-daggeeda. Marka la eego caasimadda Hargeysa waxa jira Cod-baahiyayaal lagu xidhay jidadka hal-bawlaha ah iyo arrimo kale oo weynanta maalintan la xidhiidha, iyadoo Madaxweyne Rayaale qaban qaabada munaasibadan u magacaabay guddi uu guddoomiye u yahay Wasiirka Arrimaha guduhu.

Maalintani, waxay shacbiga Somaliland ugu fadhidaa qiimo aad u badan oo Naf iyo maal-ba leh. Sida la og-yahay, dad-yawga dunidu waxay ku kala tageen heerka dhugashada taariikhdooda. Haddaba, Wargeyska Geeska Afrika, isagoo taas dabaqaya, waxa uu sannad kasta Akhristayaashiisa u soo gudbiyaa nuqul ka mid ah khudbadii Marxuum Cabdiraxmaan Axmed Cali (Tuur) ka jeediyay Xafladii lagaga dhawaaqay gooni isu taagga Somaliland, 18 May, 1991. Sidoo kale labada sawir ee la socda warkan ayaa ah laba muuqaal oo Madaxweynihii u horeeyay ee Somaliland iyo madaxweyne ku xigeenkii u horeeyay laga qaaday isla maalintaas 18 May ee lagu dhawaaqay la soo noqoshada madaxbanaanida Somaliland. Marxuum Cabdiraxmaan Axmed Cali, waxa uu hadalkiisa ku bilaabay. “Sidaa uu idiin sheegay Mujaahid Ibraahim Meygaag Samatar galabta oo Burco la Joogo waxa uu golaha dhexe ee SNM go’aansaday in waqooyigu gooni isu taago oo uu samaysto dawlad madax banaan. Taasina ma aha wax ku kooban golaha dhexe ee waxa uu ka turjumayaa dareenka dadka ku nool Waqooyiga, waanad la socoteen shirarkii u socday dadka waqooyiga.

Ummaddii way shirtay waxaanay gaadheen tallooyin waaweyn, Golaha dhexe ee SNM wuxuu isku raacay in waqooyigu gooni isu taago taas macnaheedu maaha in colaad cadaawe iyo calool xumo ay jirayso koonfur iyo waqooyi, waxaanu annagu diyaar u nahay maamulka Golaha Dhexe iyo ummadda waqooyiga ku nool in walaalahayaga koonfureed la yeelano cilaaqaad wanaagsan oo walaaltinimo ah oo wax tar leh oo danahooda guud ahaaneed ka wada hadli kara.

Annaga oo ah laba dal oo labaduba madaxbanaanyihiin iyada oo ay dantu ku kalifayso inay wax badan iska kaashadaan iyaga iyo dawladaha kale ee aanu jaarka nahayba. Sidaas ayaanu annagu jecelnahay waxaanuna ka rajaynaynaa walaalahayaga koonfurta inay iyaguna sidaa u arki doonaan taas oo aan iyagana waxa dhibaato ah u lahayn, waxaan Eebe ka rajaynayaa in uu go’aankani noqdo mid waara.”
 

www.geeska.net