Kharash
intee le'eg ayaa kaga Baxa Xukuumadda Madaxwayne Siilaanyo Jawaabaha
Mucaaridka iyo Shaqsiyaadka Dhaliila Waxqabadkeeda? WQ/Mustafe
Future
Xukuumad waliba waxay wadataa waayeheeda Waxqabad iyo Door ay ka
Ciyaarto Siyaasada Wadanka hadba halka ay marayso, waxaan jira jidad
badan oo Loo Adeegsado Ka hortaga Mucaaridada, Dhaliilaha iyo God-daloolooyinka
Shaqo ee ka soo bixi kara hawlmaalmeedka Xukuumaddu u hayso
Shacabkii soo doortay.
Sida aynu wada ogsoonahay Shaqo la qabanayo Dhaliil lagama waayo,
dhaliishu waxay Daawo u tahay Waxqabad la,aanta iyo shaqo xumadda
waxaanay dhiiri galin u samaysaa Masuulka Shaqadiisa la dhaliilay,
waana meelaha siyaasigu wax kala soo dhex baxo ee uu ka faa,iidaysto,
sidaa darteed dhaliishu waxay faa,iido badani ugu jirtaa Xukuumadda
iyo masuuliyiinteeda kuwaasi oo u baahan in ay Dhaliilahooda dhinaca
wanaagsan uga faa,iidaystaan balse aanay wakhtiga iskaga qaadin iska
caabin, difaac iyo jawaabo Daciifa oo aanay bulshadu u garaabi
Karin.
Alle ha u naxariistee Marxuum maxamed Xaaji Ibraahin Cigaal ayaa
inta badan la qiraa in uu ka mid ahaa Masuuliyiintii Dhagaysan
jirtay Dhaliisha Bulshadu usoo jeediso Xukuumadiisa isaga oo Xanta
Suuqa ka jirta ka sheegi jiray Fagaaraha Khayriyada ee Bulshadu
iskugu Timaado.
Aan udaadago Duluc Mawduuca oo ah Kharashaadka Xukuumaddu ku Bixiso
jawaabaha Mucaaridka iyo Shaqsiyaadka Dhaliila Siyaasadda Hogaanka
taasi oo Caado u noqotay Xukuumadda Madaxwayne Siilaanyo tan iyo
intii ay la wareegtay talada Dalka, waxaa ku badan dhagaha bulshada
Somaliland ku dhaqan mar kasta oo Masuul ka mid ah Mucaaridka ama
Shaqsi kale oo Bulshada Sumcad ku dhex lehi dhaliilo Waxqabadka
Xukuumadda iyo Balanqaadyadii Madaxwaynuhu samayn jiray Wakhtigii uu
Macaaridka ahaa in badi masuuliyiinta Xukuumaddu iska Daba jawaabaan
iyada jawaabaha Qaarkood is burinayaan oo aanay war isku haynin
marka ay jawaabayaan.
Waxaa inta badan dadku aad u barteen Shaqsiyaad badan oo Marka ay
hadlaanba Todobaad dhan Xukuumadu ka jawaabto Dhaliisha ay soo
jeediyaan, kuwaasi oo aan waxqabad lagaga jawaabin ee Cay iyo
Aflagaado lagaga jawaabo Dhaliisha ay soo jeediyaan iyada oo ay ka
mid yihiin Masuuliyiinta ugu Caansan ee Xukuumaddu u wada jawaabto,
Dr.Maxamed Cabdi Gaboose, Mujaahid Xasan Ciise Jaamac, Eng.Faysal
Cali Waraabe, muj.Cali Gurey iyo Masuuliyiin kale.
Beenalaha Calaamadihiisa waxaa ka mid ah Waxa uu ka Gubtaa Runta iyo
Xaqiiqada waxaanu Dagaal ba’an la gala wax kasta oo Taageeri kara,
waxaanu isku dayaa in uu Bulshada marin habaabiyo oo Meelo kale wax
ka tuso si loo ilaawo Beenta uu sheegayo, waxaanu abuuraa Xiisad
kale oo bulshadu kaga mashquuli karta beentiisa.
Waxaan tusaale gaaban u soo qaadanaynaa Maalin uu halday Dr.Gaboose
oo uu soo bandhigay Meelaha Xukuumadu u liidato iyo Go,aan
Qaadashada madaxwayne Siilaanyo waxaa jawaabo kala duwan ka Bixyay
ku dhawaad 5 masuul oo siyaabo kala duwan uga hadlay Dhaliisha
Gaboose usoo jeediyay Xukuumadda kuwaasi oo qaarkood inta ay ka
gudbeen dhaliishii si shaqsi ah u weerareen Masuulkan dhaliisha soo
jeediyay.
Kharashka ugu yar ee Todobaadkaa ku Baxay Jawaabta dr.Gaboose waxaa
lagu Qiyaasi karaa Shan iyo Toban kun oo Dollar ($15,000 ) oo ku
Baxay Warbaahinta Madaxa Banaan oo kaliya gaar ahaan TV-yada,
Joornaalada iyo Website-yadda, kuwaasi oo Shaqsiyaad kala duwan ka
Qaaday lacagta Baahinta Jawaabtan oo Xukuumaddu aad u danaynaysay,
Masuuliyiinta jawaabayayna ay aad danaynayeen in Jawaabtooda
Madaxwaynuhu Gaadho iyada oo mararka Qaar shaqsiyaadka jawaabaya ay
soo galaan Salaadiin iyo Masuuliyiin Dibad joog ah.
Kuma koobna oo kaliya jawaabaha dhaliisha laga bixiyaa Siyaasiyiinta
iyo Mucaaridka balse xataa mararka qaar waxay gashaa Abwaanada iyo
wax garadka kale ee bulshada waxaana tusaale gaaban inoogu Filan
Jawaabtii laga Bixiyay Gabaygii Gunaad ee Xasan Daahir Ismaaciil (Weedhsame)
ku dhaliilay Waxqabadka Xukuumadda iyo Sharciga sida loogu dhaqmo
kaasi oo kharashkii habeenkaa jawaabta ku baxay lagu qiyaasay $9000
sida waliba ay ii xaqiijiyeen Masuuliyiin aad ugu dhuun daloola
Madaxtooyada oo qaarkood ka qayb ka ahaa Barnaamijka.
Waxaan Xasuustaa habeenkaa anniga oo ku Gudo jira Hawlmaalmeedkayga
shaqo isla markaana Xafiiskayga ku Sugan ayaa waxaa isoo wacay Wiil
dhalinyaro ah oo ka mid ahaa shaqaalaaha Xafiiska Afhayeenka
Madaxwaynaha waxaanu ii sheegay in ay jirto Caawa Xaflad
madaxtooyadu Qaban qaabinayso taasi oo uu iga dalbaday in aan imaado
Hotel Summer time oo Xafladu ka dhacaysay, waxaan u diray Mid ka mid
ah Wariyeyaasha Xafiiska oo aanu isheegay in Madaxtooyadu Bixinayso
kharashka Xafladaasi sidaa awgeed ka qayb qaato oo uu tago,sidiina
uu ku tagay, Cabaar markii uu iga sii maqnaa ee uu meeshii gaadhay
ee ay xafladii bilaabantahay ayuu ii soo sheegay in ay xafladu tahay
mid lagaga jawaabayo Gabay uu Abwaan weedhsame ku dhaliilay
Xukuumadda iyada oo uu Gabaygaasina uu ka jawaabayo Abwaan ka mid ah
Abwaanada Gobolka Togdheer.
Markii aan dib u tix raacay ee aan waraystay Dumar iyo Dhalinyaro
badan oo ka mid ahaa masuuliyiintii Xisbiga Kulmiye oo goobta ku
sugnaa ayaa waxa la ii xaqiijiyay in abwaanka gabayga ka jawaabaya
la siiyay lacag dhan $5000 taasi oo uu soo gaadhsiiyay masuul ka mid
ahaa Xukuumadda oo Habeenkaa Xaflada joogay isla markaa iska
dhigayay marti sharaf oo kale, kharashka intiisa kalena ku baxday
hotelka iyo Warbaahita madaxa banaan.
Tiro iyo Cadad ma laha Kharashaadka ku Baxa Jawaabaha lagu Difaacayo
Dhaliilaha loo soo jeediyo Xukuumadda iyada oo aanay meesha ka
madhnayn jawaabaha Qalinka iyo Gabayga oo muddooyinkan danbe soo
badanaya, tusaale ahaan jawaabaha Qoraaladii Boobe yuusuf Ducaale ku
duri jiray Xukuumadda, Gabayada iyo heesihii Abwaan ilko jiir oo
bulshada inteeda badani ogayd halka ay gaadheen, kuwaasi oo noqday
meelaha ugu badan ee Xukuumaddu ku bixiso Hantida Shacabka iyada oo
Magaalada hargeysa inteeda badani biyo la,aadahay.
Waxaa iyana hadda Taagan Tan Faysal Cali Waraabe usoo jeediyay
Wasiirka Madaxtooyada iyo Madaxwaynaha taasi oo ay Bulshadu arkayso
inta jawaabood ee kala duwan ee Xukuumadu ka bixinayso iyada oo ay
dheertay labada jawaabood ee Wasiirku ka Bixiyay Arinta lagu
dhaliilayo iyo shaqsi weerarka lagu Sameeyay Masuulkii dhaliisha soo
jeediyay.
Jidkan Cusub ee ay Jeexday Xukuumadda Madaxwayne Siilaanyo ayay
Dadka badankiisu Aaminsanyihiin in ay ka mid tahay Asbaabaha lagu
soo xulo masuuliyiinta la magacaabayo inta ay jawaabi karaan, waliba
ay ujawaabi karaan Bulshada ay kasoo kala jeedaan, haddii laga
waayana iyada oo aanay dhaliil kale jirin xilka laga qaado oo lagu
badalo Afmiishaar kale oo si Fiican u Caytami yaqaana.
Guntii iyo Gunaanadkii waxaan Aragtidayda ku soo Afmeeri lahaa
Shaqsi kasta Masuuliyad ayaa ka Saaran Xilka loo igmaday, waana la
dhaliili karaa Waxqabadkiisa inta uu xilka hayo balse maaha in uu
Masuuliyadii loo doortay ku illaawo is difaac iyo jawaabo caantayn
ah, illaahay ayaa kaala xisaabtami doona waxa aad ka qabatay
Shaqadii laguu dhiibay ee alle kaga cabso Amaannada aad umadda u
hayso. Wa bilahi tawfiiq.
WQ/ Mustafe Future
mccfuture@hotmail.com
Berlin Germany
|