Guddoomiyaha Golaha
Guurtida oo ku Baaqay in si Degdeg ah loo Joojiyo Colaada Dagaal ee
Degaanka Ceelbardaale
Guddoomiyaha Golaha Guurtida Md.
Saleebaan Maxamuud Aadan, ayaa ku baaqay in si degdeg ah loo joojiyo
colaadda dagaal ee ka aloosan meesha la yidhaa Buqdhada oo ka tirsan
degaanka Ceelbardaale ee Gobolka Gebilay, kadib markii shalay koox
dablay ahi weerar gaadmo ah oo ay ku qaadeen rag la sheegay nay beer
ka shaqaynayeen ku dileen laba nin ugu yaraan sideed kalena ku
dhaawacmeen.
Md. Saleebaan Maxamuud Aadan oo xalay shir jaraa’id ku qabtay
gurigiisa waxa uu ka dalbaday beelaha degaankaas wada dega inay
damiyaan colaada dagaal ee aloosan, isla markaana joojiyaan gurmadka
iyo colka la wado.
Guddoomiyaha Guurtidu waxa uu ka digay dagaal sokeeyo oo ka
dhexqarax beelaha walaalaha, kaas oo uu ku tilmaamay mid aan iyaga
iyo qaranimada Somaliland midna dan u ahayn, sidaa daraadeedna uu u
soo jeediyey beelahaas inay nabad ku soo dabaalaan degaanka.
“Waxa beryahanba isku horfadhiyey jiida degaanka Ceelbardaale laba
beelood oo reer Awdal iyo reer Gabiley ah, colaadina ay ka dhex
aloosan tahay, waxaan magaca ummadda somaliland iyo ka Golaha
Guurtidaba idinkaga codsanayaa in gurmadka iyo colka la joojiyo,
nabadna lagu soo dabaalo degaanka. Maanta dantiina iyo ta qaranka
midna maaha in laba beelood reer Somaliland ah dagaal uu ka dhex
aloosmo, maantana (shalay) waxa dhacay dil iyo dhaawacba, markaa
waxaannu ka baryeynaa labada beelood inay colka joojiyaan nabad iyo
xasiloonina ay ku soo dabaalaan degaanka. Waxaan tacsi u dirayaa
ehelada raggii geeriyooday maanta, kuwo dhaawaca ahna waxaannu
Ilaahay uga baryeynaa caafimaad degdeg ah,” ayuu yidhi Md. Saleebaan
Maxamuud Aadan.
Guddoomiyaha Golaha Guurtidu Md. Saleebaan Maxamuud Aadan, waxa uu
ugu baaqay Wasaaradda Daakhiliga inay ciidammo nabadgelyo si degdeg
ah degaankaas colaadu ka aloosan tahay ugu dirto, isaga oo sheegay
inay gole ahaan iyaguna si dhakhso ah wefti nabadgelyo oo beelaha
dhexgala u dirayaan.
Isaga arrintaas ka hadlayeyna waxa uu yidhi; “Waxaan ugu baaqayaa
Wasaaradda Arrimaha Gudaha iyo xukuumaddaba inay ciidammo nabadgelyo
degdeg meesha ugu dirto, annaguna Guurti ahaan waxaanu dhakhso u
diraynaa wefti dhexgala arrinta nabaddana idin kala shaqeeya oo
dhexdhexaadin qabta.”
Dhinaca kale, xisbiga mucaaradka ah ee UCID, ayaa isna ku baaqay in
la joojiyo oo laga hortago colaad dagaal sokeeya dhalisa oo beelaha
walaalaha ah ee degaanka Ceelbardaale wada dega dhexmara.
Afhayeenka xisbiga UCID Md. Xasan Xuseen (Codyare) oo xalay khadka
telefoonka kula soo xidhiidhay Jamhuuriya, ayaa masuuliyadda
rabshada dhimashada iyo dhaawaca dhalisay ee shalay ka dhacday
degaanka Ceelbardaale ku eedeeyey xukuumadda iyo Baarlamanka oo uu
sheegay inay xilkoodii gabeen oo ay waxba ka qaban waayeen colaadaas
oo muddo soo jirtay.
“Xisbiga UCID isaga oo aad uga naxsan, ugana tiiraanyeysan dagaalka
maanta (shalay) ka dhacay degaanka u dhexeeya Gabiley iyo Degmada
Baki, kaas oo dhimasho iyo dhaawacba geystay, una dhexeeya beelaha
casabada, wadadhalashada iyo noloshaba wadaaga.
Xisbiga UCID wuxuu arrintan ku cambaaraynayaa xukuumadda iyo
golayaasha Baarlamanka oo ka gaabiyey xilkoodii, muddadana dhawaaqa
saansaanta colaadeed dhegaynayey. Waxaannu xisbigu ka cosdanayaa
beelaha labada dhinac inay xakameeyaan colaadda uraysa, si looga
hortago dhimasho iyo khasaare kale,” ayuu yidhi Md. Codyare.
Afhayeenka UCID waxa uu ugu baaqay golayaasha Baarlamanka,
xukuumadda, waxgaradka iyo hoggaamiyo-dhaqameedka inay si dhakhso ah
uga hawlgalaan joojinta colaad sokeeye oo degaankaas ka dhalatay,
isaga oo soo jeediyey xiisadan cidii ku lug yeelata tallaabo sharci
ah laga qaado.
Jamhuuriya Online
|