Golaha Wakiillada oo
Maanta Baaq ka soo Saaraya Go’aankii Qaramada Midoobay ee
Qiimaynta Nabadgelyada Somaliland
Mudanayaasha Golaha Wakiillada
Somaliland, ayaa maanta la filayaa inay soo saaraan baaq ay kaga soo
horjeedaan go’aankii Qaramada Midoobay ee qiimaynta Somaliland ay ku
tilmaantay kaalinta afraad.
Mowqifkan Golaha Wakiilladu ka qaadan doono qiimaynta Qaramada
Midoobay, ayaa ka dambaysay kadib markii Guddoomiyaha Golaha
Wakiillada Md. Cabdiraxmaan Maxamed Cabdillaahi (Cirro) oo shalay ka
hadlayey furintaanka kalfadhigii 8aad ee Golaha Wakiillada uu
sheegay in loo baahan yahay in goluhu arrintaa mowqif cad ka soo
saaro.
“Waxaynu ognahya in Qaramada Midoobay inagu riixday heerka afraad
dhinaca nabadgelyada, arrintaana waxaynu u baahanahay in aynu gole
ahaan baaq iyo mowqif ka soo saarno,” ayuu hadalkiisa ku soo
gebogabeeyey Guddoomiyuhu.
Guddoomiyaha Golaha Wakiillada Md. Cirro waxa uu uga tacsiyadeeyey
qoyskii, carruurtii, mudanayaasha golaha iyo dhammaan shacbiga reer
Somaliland geeridii ku timi Marxuun Xildhibaan Yuusuf Maxamed Cali (Tuke)
oo dhawaan ku geeriyooday shil baabuur oo ka dhacay Gobolka Togdheer.
Waxaannu Md. Cirro golaha ku wargeliyey Mudane cusub oo soo buuxiyey
kaalintii uu Marxuun Tuke ka baxay iyo qaadhaan loo ururin doono
qoyskii uu Xildhibaanku ka geeriyooday.
“Waxaan Golaha ku soo dhawaynayaa Xildhibaan Cabdiraxmaan Maxamed
Talyanle oo soo buuxiyey kaalintii uu ka baxay Alle ha u naxariistee
Xildhibaan Tuke. Mudanayaal waxa hore inooga geeriyooday Alle ha u
naxariistee Xildhibaan Maxamed Cumar Jabaabur, mudanayaashu qoyskii
uu ka baxay waxay ugu deeqeen min boqol dollar, sidaa darteed
arrintaasi waxay inoo noqon doontaa xeer hoosaad inta la helayo wax
lagaga maarmo, taas awgeed annaga oo raacayna dhaqankaa hore
mudanayaasha waxa laga goyn doonaa gunadooda bilaha January iyo
February min kontan dollar, shirguddoonka Goluhuna wuxuu ku dari
doonaa $2000, markaa qoyskii uu ka baxay Xildhibaan Tuke waxaynu ku
tabaruci doonaa $10000 (toban kun dollar),” ayuu yidhi Guddoomiye
Cirro.
Guddoomiyuhu waxa kale oo uu sheegay inay gole ahaan ka xunyihiin
gacansaar ciidanka booliska ee kaantaroolka bariga magaalada
Hargeysa dhawaan nabar ku gaadhsiiyeen xildhibaan Saleebaan Cali
Bukhaari.
“Waxaannu gole ahaan xusaynaa in aannu aad uga xunahay falkii aan
dastuurka waafaqsanayn ee dhaawaca loogu geystay Xildhibaan
Saleebaan Cali Bukhaari, Wasiirka Arrimaha Guduhu wuxuu noo
xaqiijiyey in la xidhay askarigii dhaawaca u geystay Xildhibaanka,
baadhistiina ay wadaan, dhacdadaas waxaannu u xilsaaraynaa Guddiga
Joogtada ah ee Golaha Wakiillada oo ka wakiilka ah Golaha,” ayuu
yidhi Md. Cirro.
Guddoomiyaha Golaha Wakiilladu waxa kale oo uu sheegay in loo baahan
yahay in goluhu mowqif cad ka soo saaro go’aankii Qaramada Midoobay
ka soo saartay nabadgelyada Somaliland oo ay ku riixday heerka
afraad.
Dhinaca kale ajandaha kal-fadhiga 8aad ee uu goluhu ku shaqayn doono
oo shalay mudanayaasha loo qaybiyey, balse weli aan laga doodin si
loo ansixiyo, ayaa isaga oo dhammaystiran waxa uu u qornaa sidan:
1. warbixinta guddid joogtada iyo anshaxa
2. xaalada ammaanka ee qaranka
3. u-yeedhis masuuliyiinta qaranka
4. mashaariicda sharci ee golaha horyaala
xeerka habmaamuuska mudanayaasha
ansixinta miisaaniyadda qaranka ee 2009
xeerka xakamaynta hubka fudud
xeerka qaranka ee mamnuucidda miinada
5. iyo wixii kale ee soo kordha.
Jamhuuriya Online
|