Faysal intuu cadhooday oo Telefoonkii igu dhigay ayuu yidhi waxaanu samayno waad arki doontaa

 


Wasiirka Arrimaha Gudaha Somaliland Cabdilaahi Ismaaciil Cali (Cirro), ayaa ka hadlay sababta ay Xukuumad ahaan shalay uga horjoogsadeen Wefti uu hoggaaminayo Guddomiyaha Xisbiga UCID oo socdaal ku tegi lahaa Magaalada Gabiley. Waxaanu sheegay inaanu jirin ogolaansho ay siiyeen Xisbiga in uu ugu kicitimo Gobolka Gabiley.

Wasiirka oo isaga oo Magaalada Saylac jooga xalay Khadka Telefoonka ugu waramayay Wargeyska Ogaal mar aanu wax ka waydiinay arrintan, ayaa sheegay in ay Xukuumad ahaan hore ugu gudbiyeen Axsaabta iyo Taliyayaasha Ciidamada Wareegto ka dhan ah dhaqdhaqaaqyada u muuqda Kaambayn Siyaasadeed ee Xisbiyada. Sidoo kale waxa uu Wasiirku ka hadlay arrimaha dhaqaalah Dawladda iyo qoddobo kale.

Waraysigaasina wuxuu u dhacay sidan;

S: Wasiir, waxa Xukuumaddu ka baajisay safar uu Wefti uu hoggaaminayay Guddoomiyaha Xisbiga UCID ku tegi lahaa Magaalada Gabiley, horena waxaad uga baajiseen Wefti la sheegay in ay Xisbiga Kulmiye ka tirsanaayeen. Markaa maxaa sabab u ah arrimahan?

J: Sidaad ogtahay waqtigii ololaha Doorashada lama gaadhin, Xeerka Doorashooyinkana Qoddobadiisa 27aad iyo 28aad ayaa qeexaya in waqtiga Ololaha uu Komishanku fasaxayo, waqtigaas oo ah marka murashaxiinta la soo dhejiyo ayay Komishanku muddada qabanayaan. Maadaama, aan muddadaa la gaadhin Wasarad ahaan waxaanu soo saarnay Wareegto aanu saddexda Xisbi, Taliyaha Ciidanka Booliska iyo Badhasaabbadaba aanu ku amrayno in la ixtiraamo Xeerkaa oo ay reebban tahay inta ka horraysa waqtiga ay Komishanku fasaxayaan in Bannanbaxyo iyo Olole Xisbiyeed la sameeyo, taas ayuun bay ahayd. Shalay (Dorraad) waxa ila soo hadlay Faysal Guddoomiyaha UCID, wuxuu igu yidhi waxaanu doonaynaa inaanu tababaro qabsano oo aanu Gabiley tagno. Dabadeed waxaan ku idhi soo maydun helin Wareegtada aanu idiin soo qornay, waxa uu yidhi waanu helnay oo waanu ku qanacnay oo waliba qolada kale way ka soo horjeedsatay, laakiin anigu yaynaan ka jawaabin ayaan idhi. Si kastaba ha ahaatee, waxaan ku idhi haddii aad Xafiiskiina gudihiisa ku qabsanaysaan Sharcigaa idiin ogol oo idiinma diidi karno, laakiin inaynu Xeerkii ixtiraamno ayaa inaga dhaxeeyee, Xeerkaa isaga oo jira aanu idin xusuusinay ha la tixgeliyo. Intaa markaan idhi ayuu inta uu Telefoonkii igu dhigay oo uu xanaaqay igu yidhi, waxaanu samayno waad arki doontaa. Nasiib darro goor dhawayd (shalay) oo aan BBC-da dhegaystay ayaa waxa uu u sheegay inkasta oo aanan sidii uu Guddoomiyuhu u aflagaadoonayay aanan u aflagaadaynayn isaga shaqsi ahaan iyo Xisbi ahaan toona, haddana wuxuu ka sheegay in markii uu ila soo hadlay aniga oo jooga Xariirad aan ku idhi Wasiiru-dawlahayga la hadal, kumanaan odhanin ee anigaa shaqsiyan ugu jawaabay oo qoraal baan amar ku siiyay Taliyayaasha Booliska, Badhasaabbada iyo iyagaba (Xisbiyada) in qoddobada Xeerkaas Doorashooyinku sheegayo la ixtiraamo oo la tixgeliyo. Markii uu ila soo hadlayna sidaas ayaanu ku wada hadalnay, inkasta oo uu isagu cadhooday oo Telefoonkiina igu dhigay oo uu waliba raaciyay haddalladaa kul-kulul.

S: Laakiin Wasiir, waxa la sheegayaa Hudheelkii Gabiley ee ay Xafladda ku qabsan lahaayeen in Ciidanku ay waxyeello u geysteen, idinku taa ma la socotaan?

J: Wallaahi, ilaa hadda wax warbixin ii soo sheegay haddii ay yihiin Mulkiilayaasha Hudheelka iyo haddii ay Maamulka tahay iyo haddii ay dad kale tahayba ma jiraan oo layma soo sheegin, haddii ay jirto Hudheel wax la yeelay ama hantiile hantidiisii wax la yeelay haddii ay jirto waa qalad. Laakiin, inkasta oo aan safar ku maqanahay oo aan imika (xalay) Saylac kaala hadlayo, haddana cid ii soo sheegtay ma jirto.

S: Wasiir, beryahan waxay u muuqataa in Deegaanada galbeed ka xiga Caasimadda, ma Gabiley ha ahaato ama Awdal ha ahaatee in aydun Xukuumad ahaan xoogga saaraysaan oo in aanay Xisbiyada Mucaaradka ahi ka muuqan aad ku dedaalaysaan siday Xisbiyada Mucaaradka ahi ku doodayaan, oo ay shegeen inay u arkaan cabudhin aad ku samaynaysaan. Maxay tahay sababtu, ma dhaqdhaqaaqoodan ayaa nabadgelyo-darro keenaya?

J: Wallaahi taa anigu uma arko ee waxa weeye Xeerkan ayuun baanu leenahay ha la ixtiraamo, waxaanay nagu eedeeyaan in aanay Dawladda Somaliland Xeerka u hoggaansanayn, anaguna Xeerkii ayaanu imika leenahay waar Xeerkan inagaa dhiganay oo Baarlamaankeenaa ansixiyay ee aynu ixtiraamno’e oo Xisbiga Xukuumaddana kama saarayno oo wuu ku jiraa, isagana uma ogolin oo imika Bullaale inta uu Mikirifoono soo qaato uma ogolin oo waanu celinaynaa berrito haddii uu Burco u bax is-yidhaa iyo haddii uu sidaa sameee is-yidhaahdoba. Maadaama, imika waqtigii Doorashadu soo dhaw dahay oo imika lagu jiro hawshii Diiwaangelinta in hawl kale Gobolkay doonto ha ahaatee lagu carqaladeeyo oo dadkii lagu jaha-wareeriyo maaha, iyada oo Xisbiyada qaarkood ay diiddanayeen Diiwaangelintan oo ay ka soo horjeedeen markooda horeba.

S: Wasiir, idinka laf ahaantiina waxa la aaminsan yahay inaad Olole waddaan, markaa idinku ka Wasiir ahaan maxaad Deegaannadaa ka qabanaysaan?

J: Gobolkan anigu imika waxaan ka qabanayaa, waxaan wadaa Badhasaabkii cusbaa ee loo bedelay Salal oo Xilkii baan u kala wareejinayay Badhasaabkii Awdal iyo isaga.inkasta oo aan saddexdii biloodba mar kormeer u baxo bari iyo Galbeed ka ay doonto ha ahaatee, haddana socdaalkaygu imika taas ayuu ku salaysan yahay. Xalayna (Habeen hore) Xariirad baanu Guddoomiyihii loo soo magacaabay ee cusbaa iyo Guddoomiyihii hore ee Saylac ee xukumi jiray aanu u kala wareejinay saaka (Shalay), imikana Badhasaabka Salal baa halkan (Saylac) jooga oo markaanu aroorta (Maanta) Xilka u kala wareejiyana haddana waxaan imanayaa tuulo Garbo-dadar la yidhaahdo oo Guddoomiye cusub oo loo magacaabay iyo Guddoomiyihii xilka hayay aanu u kala wareejinayaa. Dabadeed dhaqadaydii caadiga ahayd ayaan ku soo noqonayaa.

S: Waxyaabaha Guddoomiyaha UCID sheegay waxa ka mid ahaa in aan dalka Dagaal loogu soo gelin in la sameeyo oo la abuuro 50 Tujaar oo ay hoos joogaan 3-Milyan oo faqiir ahi, taana wuxuu idiinla jeeday idinka Xukuumad ahaan oo loo arko in Musuq-maasuq ay ku xoolaysteen. Maxaad ka leedahay taas?

J: Inkasta oo aanan dhegaysan hadalkaa, hadalksiisii BBC-dana aanay ku jirin. Hadana idinka (Saxaafadda) ayay idinku fiicnayd inaad waydiisaan cidda uu ula jeedo 50-kaa Tijaar oo uu qaar idiinka magacaabo.

S: Dabcan, adiga laftaada ayaa ka mid ah kuwa loo arko inay ka mid yihiin?

J: Dee horta inaad waydiisan ayay ahayd oo haddii uu idin yidhaahdo Cabdilaahi-Ciro waa ka mid oo uu I magacaabay, waa su’aal kale. Laakiinse markii uu yidhi 50 Tijaar ayay Dawladdu samaysay, Suxufiyiinta ayay ahayd in ay 50-kaa Wasiir waydiiyaan oo ay yidhaahdaan noo magacow.

S: Adiga iyo Wasiiro kale oo Xukuumadda ka mid ah mid ayaa mid ka mid ah Xildhibaanada Golaha Wakiilladu wuxuu idinku tilmaamay inaydaan Xisbiga UDUB ka mid ahayn oo aydaan maalgashan, sidaad Wargeysyada ku arkayseen. Maxaad ka odhanaysaa taas?

J: Xildhibaano caynkaa yidhi maan arag, tan maanta (shalay) safar baan ku maqanay oo maan arag. Markaa bal aan soo noqdee, su’aashaa jawaabteeda dib iigu dhig.

S: Laakiin qoladan UCID iyo qoladii Kulmiye ee ka horraysay ee aad soo celiseen labadooda midna kaambayn ma wadin, waxase laydinku dhaliilayaa inaad idinku ku af-gobaadsanaysaan oo aad leedihiin safarradooda fawdo ayaa ka dhalanaysa. Markaa miyaan la odhan Karin arrin siyaasadeed baa ku hoos jirta, maadaama aad idinkuba meel walba maraysaan oo aad Kaambayn ka waddaan?

J: Maya, anigu waan kuu sheegay shaqada aan imika u socdo, Warbaahinta ama TV-yada nala socda waad ka arki doontaan haddii aan ka hadlay arrimo Siyaasadda UDUB iyo taageerada Dawladda toona, marka laga tago Nabadgelyada iyo waxqabadka. Haddii aan kelmad kale yidhi waxa laga yaabaa inaan ka hadlo oo aan Dadweynaha ku dhiirigeliyo oo aan idhaahdo fursaddan ka faa’iidaysta Diiwaangelinta oo qof kasta oo Muwaadin ahow si aad xuquuqdaada u heshid is-diiwaangeli. Maan odhan marnaba UDUB isu-diiwaangeli ee waxaan leeyahay dadka aan la hadlayo fursad Dahabiya ayaad haysataa ee ka faa’iidayso oo muwaadinimadaada caddayso. Taana meesha aan ka hadlaba waan ku daraa, laakiin UDUB ugu rida codka, Madaxweynaha doorta, Xukuumadda noo cusboonaysiiya iyo olole siyaasadeed toona kama hadlo oo waqtigeedii lama gaadhin, ee marka la gaadho ayaanu ka hadli doonaa haddii aanu Xukuumadda nahay oo wixii ay Mucaaradku nagu dhaliilayaan aanu iska daafici, wixii kale ee Kaambayn kale aanu ku soo galayno iyo qorshahaygana aanu soo bandhigi doonaa.

S: Laakiin, waxa la sheegayaa in Madaxweynuhu Shirkii Wasiirada uu xubin walba oo Golaha Wasiirada ka tirsan uu ku amray xubin walba sidii uu Kursigiisa u difaacan lahaa uu yeelo oo uu Cod raadsado. Kuwaas oo la filayo in ay dhawaan safarro ugu kala baxaan Gobollada dalka dhawaan. Arrintaasi ma jirtaa?

J: Horta, arrintaa aniga iyo Maayarka ayaa Mashaariic soo fulinaynay oo Isniintaa-Isniinteedii ayay ahayd oo goob-joog maan ahayn. Hase yeeshee, haddii lagu soo hadal qaaday arrintaa Golaha Wasiirada wixii lagaga hadlo suuqa uma soo baxaan. Waxa weeye ku-tidhi-ku-teen iyo male-awaal, golaha Wasiiraduna waxay umadda u hayaan Xilkii Qaranka. Markaa wixii ay Wasiiradu ku shiraan ee ay ku hadlaan ama Madaxweynuhu kula hadlo waxay doonto ha ahaatee, dee bannaan-yaal maaha.

S: Wasiir, waxa la leeyahay Shaqaalihii Dawladdu Mushahar may arag oo dhaqaale-la’aan baa jirta oo Dhaqaalihii xoog buu u dhacay, oo Dawladdu dhaqaale ahaan way diciiftay waxaana u sabab ah Musuq-maasuq baahay. Horena Madaxweynuhu guddi Wasiir ah ayuu u saaray. Waa sidee dhaqaalaha Xukuumaddu?

J: Wallaahi, inkasta oo aanan Guddigaa dhaqaalaha ku jirin, haddana waxaan ogahay in Dhaqaalihii dawladdu ay meel fiican marayso ayaan ogahay, Dakhli-ururintana olole fiican baa loo galay. Shaqaalahana, kulama qabo oo kuwa Wasaaraddayda ayaan ogahay oo bishan October ee socota mooyaane bilihii kale oo way qaateen. Markaa ma ogi shaqaale Wasaaradeed oo ka cabanaya Mushahar-la’aan, Ciidamadana waan ogahay oo 25-ka bisha ayay qaataan.

 


Source: Ogaal