Far-Somalida Jooji Oo Reer Somaliland-oow Far-afeed (xuruuf Cusub)
Samayso
- Sida aan wada ogsoon-nahay far-afeeda ama erayada qoran ee hadalka
ah ee aan qajeel u adeegsano nolol-maalmedkeenu hadii aynu nahay
reer Somaliland, waa far-Soomaaligii la qoray 1972-kii, oo kaaga sii
darane ay ku magacaaban yihiin walibana inoogu mano-sheegtaan
maamulkii ASKARTA ahaa ee xasuusteena xumaanta badan kaga tagay!
Runtii, waa arin naxdinteeda leh oo damqaysa dareenkeena, waxana
dhab ah in inta aynu wali adeegsanayno Far-soomaaliga aynaan ka
bogsanayn aramidii iyo uur-kutaaladii ina soo martay. Sidaa aawadeed,
waxa ay ila tahay in la gaadhay xiligii laga tashan lahaa qodobkaasi
oo ah, ka kali ah ee hadhay ee ay dadka reer Somaliland weli la-sii
wadaagaan, dadkii aan kala baxnay ee aynu uurka iyo awrtaba kala
raranay ee reer Soomaaliya.
Mudodii yarayd ee aynu dalkii Talyaanigu gumaysan jiray ee
Soomaaliya isku meerarnayn ee aynu ahayn qindiga la isku
bilkaydinayo, wax badan ayaa iskaga keen laaqmay, oo waxaa aynu isku
nudnay oo aynu isku tolnay laba qaran iyo agab waxay lahaayeen sida,
dastuuradii, lacagihii, calamadii, magaalo madaxyadii, ciidamadii
iwm. Waxana hubaal ahayd inay arintaasi dheef iyo dhib ay inoo
lahayd. Oo tusaale ahaan;
Dheefta ay inoo keentay isku biiristii lixdankii ee aan ka dhaxalnay
waxa ka mid ah, dadkii Soomaalida ahaa ee aynaan waxba ka aqoon oo
aan baranay, oo dabadeedna xiise-baldhaqii Somali-waynta ahaa ee aan
danta iyo runta ku salaysnayn oo aan guntiisii gaadhnay. Dhibta ay
lahaydna waa laga wada dheregsan yahay oo waa ina-daan-wayne, waana
ta sandulaha ka dhigtay in maanta la kala yahay sida aan wada
ognahay ee '' Fantashiruu Fil-ardi-da ah''! Ee atlada ku riday,
Isma-dayato-da!
Weli anigu midow ka xumaa kaan soo marnay maan arag mana maqal !
yaab. 'Laba munaafaqnimo ku heshiisaa hor Allah ayaa ay ku colowdaa''
ayaa ay Somalilanders-ku ku maahmaahaan! Waxa aan muran gali karin
in midnimo ku sheegii lixdankii ay Xaaraan ahayd aan Xalaali meel-na
kaga dhibcin! Cadaynteeda waxa kuugu filan, hagardaamoda dhacday
intii la wada-joogay uun bal dib u-yara mildho.
Jab iyo lee-leel ayaa arlada asiibay oo kala yaac baa dhacay oo
nasiib-daro, sidii geedigii hore ee isku guurku ahaa ee
01/07/1960-kii aan Somalia-italia dhankeeda ugu dadbanay oo kale
xaajadu uma hawl-yaraan. Tan dambe (18/05/1991) ee kala xayoshada
iyo guryo noqoshada ahayd aayar-tii dhalatay iyo faduul la'i, looma
kala noqon ee xasuuq baa dhacay-oo xinjiraa bururay, xoolaa
mooro-duugmay-oo xeradood ba'day. Haatan-se dhib wax la soo mutayba
la soo doog oo guryo-samodii geediga loo lalabayna la gaadh oo lagu
fur.
Si kastaba ha ahaatee, waxii kale iska soo dhadhawaa haatan ee hal
shay ayaa uu bedelkiisu inagu hadhay si aan gabi-ahaanba xor uga
ahaano xasuusta waxii la isku odhan jiray Soomaaliya! kaasina waa
Far-afeed (Far-Somalida). Waxa khasab inagu ah inaan mid u gaar ah
dadkeena oo waliba Ugub ah oo aan horteen la samayn aan soo saarno.
In qoomiyadii ay afkeeda qortaa waa arin maamuus mudan waxase ay
milgaha iyo miiganidu awrantaa hadii ay curiyaan summado aan hore u-jirin
oo yixdoodii wata!
Qorista afku ama in la hindisaa Far-cusub mar bay adkayd haatanse
waxa ay iska noqotay xaajo curad ah oo hawsha inteeda badan waa la
kala dheegtaa uun! Waxa sidaas darteed waajib-qaran iyo mid qofeedba
reer Somaliland ku ah inay, ku dadaalaan sidii ay dalkooda ugu dhigi
lahaa mid waxyaalo badan iskiisa u-leh, hana ugu horayso aqoonta oo
ku qotonta far-Somalilander-ku ay hindiseen oo la yidhaa; ''Far-Somalilander.
Gabo-gabo; Umad kasta oo hiigsanaysa inay Ifka inta ay joogto meel
sare gaadho waxa la gudboon inay ku dadaasho, inay Sawrac iyo
tilmaan u gaar ah dhankii la dayoba ay yeelato, oo dabadeedna ay sii
kobciso oo ay sii tabantaabiso si dhaxalkaa u-gaarka ahi uu ugu
tis-qaado oo uu aayaheeda wax-tar miigan ugu yeesho. Qoraalku (far-afeed)
waa sirta iyo salka HORUMARKA.
Sidaas darteed, waxban odhan lahaa, Tartan Far la Ikhtiraaco ah oo
ay leeyihiin reer Somaliland dhakhso ha loogu dhawaaqo. Hubaal waxa
ah in Sumado cusub oo ciidaa ka badan oo dharabkii wata aynu mudo
kooban ku kala dooran doono.
Ha jirto Somaliland
Oo Ha Joogto
Waligeed!
Cali Cumar Xasan
|