Deeqbixiyeyaasha
oo Markale Walaac Culus ka Muujiyey Khilaafka
Siyaasadeed ee Dalka ka Aloosan
“Waxaannu qiimaynaynaa saamaynta
khilaafkani ku yeelan karo deeqaha joogtada ah ee aannu siino
Somaliland”
Warsaxaafadeed - Xafiiska Midowga Yurub ee Nairobi
Deeqbixiyeyaasha Somaliland ka caawiya hirgelinta doorashooyinka,
ayaa markale walaac culus ka muujiyey khilaafaadka siyaasadeed ee
waqtigan hadheeyey dalka, kaasoo ay ku tilmaameen in mid
minjo-xaabin kara horumarka iyo qarannimada Somaliland.
Sida lagu sheegay warsaxaafadeed shalay laga soo saaray xafiiska
deeqbixiyeyaasha Midowga Yurub ku leeyahay magaalada Nairobi ee
caasimadda dalka Kenya, waxa ay axsaabta qaranka iyo hoggaanka
Somaliland ugu baaqeen in ay muujiyaan is-xakamayn waayeelnimo
siyaasadeed, isla markaana tixgeliyaan hannaanka dimoqraadiyadeed ee
shacbigu higsanayaan, khilaafaadka u dhexeeyana ku dhammaystaan
wadahadal iyo is-qancin.
Warsaxaafadeedka deeqbixiyeyaasha oo ku qornaa afka Ingiriisada oo
aannu idiin soo tarjunay, waxa uu isagoo dhammaystiran u dhignaa
sidan:
“Deeqbixiyeyaasha Somaliland ka caawiya mashruuca dimoqraadiyaddu
waxay si walaac qotodheer leh ula socdaan waxyaabaha beryahan dambe
isa soo tarayey ee khilaafka siyaasadeed ah, kaasoo si xun oo laga
murugoodo u minjo-xaabin kara hannaankii iyo qarannimadii Somaliland
ku caano-maashay ilaa sannadkii 1991.
Deeqbixiyeyaashu waxay qiimaynayaan saamaynta khilaafyadani ku keeni
karaan caawimadii joogtada ahayd ee ay ku bixin jireen hannaanka
dimoqraadiyadeed ee Somaliland.
Waxa deeqbixiyeyaashu ku adkaysanayaan in aanay jirin fursad kale oo
u bannaan dhinacyada ishaya oo aan ahayn in ay duruufahan qallafsan
kaga bixi karaan wadahadal dhexdooda ah oo ay ku xalliyaan muranka
taagan, waxaanay deeqbixiyeyaashi si degdeg ah ugu baaqayaan in
hoggaanka siyaasadeed ee dalku muujiyaan is-xakamayn qaan-gaadhnimo,
isla markaana tixgeliyaan masiirka dimoqraadiyadeed ee dadweynaha
reer Somaliland higsanayaan,” ayaa lagu yidhi warsaxaafadeedka
deeqbixiyeyaasha caalamiga ah.
Jamhuuriya Online
|