Dawladda Ingiriiska oo Rayaale iyo Guddoomi yayaasha Xisbiyada
Mucaaridka ah ugu Baaqday in Khilaafka
Siyaasadeed Lagu Dhammeeyo Wadahadal
Kulamadii weftiga Ingiriisku la
yeeshay madaxda Somaliland iyo nuxurka wadahadaladii ay yeesheen
“Waxaanu mar walba diyaar u nahay in aanu dhawrno xeerka iyo
dastuurka qaranka, anaga oo tixgelinayna go’aamadii ay wakhtiga
doorashada ka gaadheen Golaha Guurtida iyo Komishanka Doorashooyinku”
Daahir Rayaale
“Waxay muujiyeen inay ayaan-darro wayn tahay arrimahan maanta dalka
ka taagani, waxayna u socdeen in dhinacyada khilaafku ka dhexeeyo ay
muujiyaan isku tanaasul”
Axmed Siilaanyo
Wefti culus oo ka socda dawladda Ingiriiska ayaa Somaliland u yimi
sidii ay xisbiyada mucaaridka ah iyo xukuumadda Rayaale ugu qancin
lahaayeen in khilaafka siyaasadeed ee ka dhashay dib-u-dhaca
doorashooyinka iyo muddo-kordhintii Guurtida ee madaxweynaha lagu
dhammeeyo wadahadal iyo isu-tanaasul, iyagoo wax walba ka
hormarinaya danta guud.
Weftigan oo shalay dalka booqasho ku yimi oo uu hoggaaminayo
safiir-ku-xigeenka safaaradda dawladda Ingiriisku ku leeyahay
caasimadda Itoobiya ee Addis Ababa Mr. John Marshal, islamarkaana
wehelinayeen saraakiil ka socda wasaaradda difaaca Ingiriiska waxay
kulamo goonni-goonni ah oo la yeesheen Madaxweyne Rayaale iyo
Guddoomiyayaasha xisbiyada mucaaridka ay ku muujiyeen walaaca
Ingiriiska iyo waddamada Yurub ka qabaan xaaladda siyaasadeed ee
wakhtigan dalku madaxa la galay, taas oo ay ku sifeeyeen in haddii
aan wadahadal lagu dhammayn mid dhaawici karta sumcaddii iyo
karaamadii Somaliland ku dhex lahayd beesha caalamka.
Guddoomiyaha xisbiga mucaaridka ah ee KULMIYE Md. Axmed Maxamed
Maxamuud (Siilaanyo) oo Jamhuuriya xalay khadka telefoonka kula
xidhiidhay si wax looga weydiiyo kulankii ay la yeesheen weftiga
Ingiriiska iyo waxyaabihii ay kada wada hadleen, ayaa sheegay in
weftigaas dalka u yimaaddeen sidii ay u qiimayn lahaayeen xaaladda
siyaasadeed ee dalka ka taagan iyo inay dhinacyada khilaafaadku ka
dhexeeyaan ay ku cadaadiyaan sidii muranka taagan loogu dhammayn
lahaa wadahadal iyo isku tanaasul dhinacada oo dhami muujiyaan.
“Waqtigan Ingiriisku wuxuu dalka u yimi inuu qiimeeyo xaaladda
Somaliland, waxaannu muujiyey welwelka ay ka qabaan sida wax u
socdaan inay dhaawac u geysan karto hannaanka dimoqraadiyadeed iyo
xorriyatul-qawlka ka hana-qaaday Somaliland, waxay aad noogu
guubaabiyeen in khilaafka jira lagu soo afjaro wadahadal, iyaguna ay
diyaar u yihiin inay halka ka sii wadaan taakulayntii ay Somaliland
siin jireen.
Annaguna waxaannu uga warramay dhibaatooyinka iyo caga-juglaynta
xukuumaddu ku hayso xisbiga KULMIYE, hadidaadaha naloo geystay,
bannaan-baxyada sharcigu noo fasaxayo ee na soo diidan yahay. Waxay
muujiyeen inay ayaan-darro wayn tahay arrimahan maanta dalka ka
taagani, waxayna u socdeen in dhinacyada khilaafku ka dhexeeyo ay
muujiyaan isku tanaasul iyo wadahadal khilaaf lagu soo afjarayo,”
ayuu yidhi Axmed Siilaanyo oo ka warramayey waxyaabihii ay weftiga
Ingiriiska ka wadahadleen.
Dhinaca kale, sida lagu sheegay warsaxaafadeed ka soo baxay
madaxtooyada, waxay weftigani shalay la kulmeen madaxweyne Daahir
Rayaale Kaahin, iyada oo labada dhinac ka wada hadleen arrimo badan
oo ay ka mid yihiin marxaladda cusub ee dalku marayo iyo
dhibatooyinka ka aloosan mandaqada geeska Afrika, sida
budhcad-badeedda iyo kalinta Somalilanda ka qaadatay la
dagaallankeeda.
Warsaxaafadeedkaas oo faahfaahsanna waxa uu u qornaa sidan:
“Madaxweynaha Jamhuuriyadda Somaliland Mudane Daahir Rayaale Kaahin,
waxa maanta [shalay] uu xafiiskiisa kulan kula yeeshay wefdi ka
socda Safaaradda Ingiriiska u fadhida caasimadda Itoobiya ee Addis
Ababa.
Wefdigaas oo uu hoggaaminayo Safiir-ku-xigeenka Safaaradda
Ingiriiska ee Addis Ababa Mr. John Marshal, waxa ay booqasho kooban
ku yimaaddeen Jamhuuriyadda Somaliland.
Madaxweynaha iyo wefdiga ka socda Safaaradda Ingiriiska waxay si
qoto dheer uga wada hadleen budhcad-badeedda ku soo korodhay
mandaqadda Geeska Afrika oo saamayn ku yeelatay waddamo badan oo ay
ka mid tahay Somaliland.
Mudane Daahir Rayaale Kaahin isaga oo ka warramayey tallaabooyinka
xukuumaddiisu ka qaaday sidii ay wax uga qaban lahayd
budhcad-badeedda ka qawlaysata Badda Cas ee ku beegan marinka
Cadmeed, waxa uu sheegay in hadda ka hor Jamhuuriyadda Somaliland ka
qabatay xuduudaheed Badda Cas dad budhcad-badeed ah, kuwaasoo la
horkeenay maxkamadaha, haddana qaarkood ku jiraan xabsiyada markii
lagu helay dembiyada ay galeen.
Madaxweynuhu waxa kale oo uu wefdiga u sheegay in mar walba xukuumad
iyo shacbiba ka go’an tahay la-dagaallanka budhcad-badeeda
xeebaheeda Badda Cas ku beegan, isla markaana waxa uu tibaaxay in
Somaliland oo ah wadan curdin oo aan kaalmo ka helin dalalka
caalamka in uu u baahan yahay in caalamku ka taageero sidii uu ula
dagaallami lahaa ka hortagga budhcad-badeedda, haddii ay noqon
lahayd qalabka la adeegsado iyo dhaqaalaba, taas oo maslaxad iyo dan
weyni ay ugu jirto Somaliland iyo caalamka intiisa kaleba.
“Waxaannu diyaar u nahay in aannu kala qaybgalno iskaashiga caalamku
ka yeelanayaan la dagaalanka budhcad-badeedda intii hadba awoodayadu
ay na gaadhsiiso, haseyeeshee waxa lagama maarmaan ah in waddamada
adduunku oo Ingiriisku ka mid yahay in taakulayn ka helno sidii aanu
arrintaasi ugu guulaysan lahayn, waxaanuna ka xunahay in caalamku
had iyo jeer nagu qiimeeyo, nagalana mid dhigo Soomaaliya, iyada oo
Somaliland tahay dal ka gooni ah Soomaaliya, kalana soo noqotay
Madaxbanaanideeda muddo 18 sannadood laga joogo,” ayuu yidhi
Madaxweynuhu.
Madaxweynaha iyo wefdigu waxa kale oo ay isla soo qaadeen arrimaha
siyaasadda ee Jamhuuriyadda Somaliland heerka ay maanta taagan
yihiin, Madaxweynuhu isaga oo arrintaa ka hadlayey waxa uu wefdiga u
sheegay in xukuumaddiisa ka go’an tahay inay dalka ka qabsoomaan
doorashooyin xor oo xalaal ah oo la mid ah kuwii hore waddanka uga
qabsoomay intii uu talada hayay, waxana Madaxweynuhu wefdiga u
sheegay in dib-u-dhaca wakhtigii doorashada ay dhici lahayd aanay
xukuumaddu masuul ka ahayn, haseyeeshee ay keeneen arrimo farsamo
iyo qaraxyadii argagaxiso ee dalka ka dhacay.
“Waxaanu mar walba diyaar u nahay in aanu dhawrno xeerka iyo
dastuurka qaranka, anaga oo tixgelinayna go’aamadii ay wakhtiga
doorashada ka gaadheen Golaha Guurtida iyo Komishanka Doorashooyinku,”
ayuu yidhi Madaxweynuhu.
Waxa kale oo uu Madaxweynuhu carrabka ku dhuftay inuu jeclaa 29kii
March ee bishii la soo dhaafay in doorashadu qabsoonto, haseyeeshee
aanay taasi suurtogelin sababo farsamo darteed, isla markaana waxa
Madaxweynuhu kula taliyey in asxaabta mucaaridku qadariyaan, una
hoggaansamaan dastuurka xeerka iyo qawaaniinta dalka u yaal.
Mr. John Marshal oo isaguna hadal kooban halkaa ka jeediyey, ayaa
sheegay in xukuumadda dalka Ingiriiska diyaar u tahay inay
Somaliland ula dhaqanto waddan ka duwan Soomaaliya, waxna kala
qabato arrimo badan oo ay ka mid yihiin dhinaca nabadgelyada iyo
xasilloonida dalkani ku caano maalay, waxaannu tibaaxay in
dawladdiisu hordhigi doonto shirarka soo socda ee caalamka kaga
tashan doono sidii wax looga qaban lahaa budhcad-badeedda,
shirarkaas oo ka mid yihiin shirka lagu qaban doono Baxrayn dhawrka
toddobaad ee soo socda waxyaabaha Somaliland ka qabatay la-dagaallanka
budhcad-badeedda iyo baahida ay u qabto in laga taageero waxyaabo
badan oo ka mid tahay sidii arrintaasi ay ugu guulaysan lahayd.
Wefdiga waxa kale oo ka mid ah wakiilka dhinaca Gaashaandhigga u
qaabilsan Safaaradda Ingiriiska ee Itoobiya, shirkana uu goob-joog
ka ahaa Wasiirka Arrimaha Dibadda Somaliland Mudane Cabdillaahi
Maxamed Ducaale.”
Guddoomiyaha xisbiga mucaaridka ah ee UCID Eng. Faysal Cali-waraabe
oo aanu xalay dhawr jeer isku daynay in aanu dhinacooda wax ka
weydiino kulamadii ay la yeesheen weftiga Ingiriiska ah ayaanay noo
suurtogalin in aannu telefoon ku helno.
Jamhuuriya Online
|