Dalka iyo Dadkuba Waxay u Baahanyiin Isbedel Dhab ah

Dhamaan shacabka Somaliland ee muslinka ah waxaan u dirayaa
salaanta islaamka,waxaanan Allaah inooga baryayaa bisha Ramadaan inuu barakadeeda iyo khayrkeeda inna siiyo,waxaan idiin raacinayaa dhamaan inaynu isa-saamaxno.

Hadaan u daadago dulucda qoraalkan,waxa muwaadin kasta ku waajib ah inuu/inay tusaale ka bixiyo aragtida u miciin ah kobcinta horumarka dalka iyo dadkaba. Muwaadin kastaaba maanta waxuu qirayaa dalkan Somaliland inuu ka soo gudbay carqalado badan,korna u qaaday horumarka dhaqan, hab-socodka siyaasadeed, balse dib u dhac ku yimi dhinaca
dhaqaale iyo dhinaca caddaalada iyo hogaaminta dalka.

Mudadaa aynu soo marnay dhawrka dawladood uguna dambayso dawladan hogaanka dalka haysaa,waxay shacabku waayo-aragnimo xooggan ka heleen waxa u dhaxeeya hababka kelis-talisnimo iyo dimuqraadiyada ku dhisan xisbiyada badan. Waxa kale ee shacabku ogyahay bud-dhigga hab-dhaqanka taageerayaasha xisbiyadu inay tahay hab-beeleed. waxa u raacay shacabka Somaliland jiritaanka khilaafaadka ka dhasha kooxaha mujaahidiinta SNM ee xisbiyada mucaaridka ah iyo kooxaha NSS-tii ka tirsanayd ee xisbiga talada haya u badan.

Arrimahaas waxa ka dhashay oo shacabku ka dhirgay hab-fikirka saddexda hogaamiye ee xisbiyada qaranka kala hogaamiya. Hadaynu kala qaadno saddexda hogaamiye,kuna horayno Madaxweynaha dalka hogaamiya, ahna hogaamiyaha xisbiga UDUB waxaa hubaal ah inay shacabku aad u
barteen hogaankiisa oo aan la mahadin muddada dheer ee uu marna Madaxweyne-ku xigeen ahaa haatana uu Madaxweynaha yahay,kana soo jeedo kooxaha NSS-ta ka tirsanaan jiray,taasina ku tusayso inuu shacabku ka dhadhansanayo aqoontiisa siyaasadeed inay ku salaysantahay
habka keli-talisnimo.

Dhinaca kale hadaynu soo qaadano hogaamiyaha xisbiga mucaaridkaa ee Kulmiye, waxa shacabka u muuqda inuu ka soo jeedo kooxaha SNM-ta ee isku bahaystay xisbigaas,waxa kale oo shacabku inaan hogaankiisa la mahadin waqtigii dheeraa ee uu hogaanka SNM soo hayay,dhibaatooyin badan oo laga soo gudbayna ka jireen ururkaa xornimada dalka u soo dagaalamay,waxa kale oo shirkii golaha dhexe ee Kulmiye ku qabsaday Burco shacabka ugu markhaati furay inuu hogaamiyaha xisbiga hab-fikirkiisa siyaasadeed yahay habka keli-taliska.

Hadaynu eegno isna xisbiga kale ee mucaaridkaa UCID hogaamiyahiisa, markuu shacabku jaleeco hab-dhaqanka iyo hab-socodka siyaasadeed ee xisbiga dhexdiisa waxa hubaal ah isna inuu ku dhaqmayo habka kelis-taliska.

Intaa waxa saddexda xisbi hogaamiye u raaca,iyagoo hore shacabku ugu codeeyay,isla haatana u diyaar yihiin inay mar labaad tartamaan.Welina dalku waxuu ku jiraa xero xidhan oo aan aqoonsi lahayn.Markaa doorashada innagu soo fool leh ee lagu dooran doono madaxweynaha waxa haboon, danta dadka iyo dalkuna ku jiraan in saddexda xisbi qaran dhamaantood keenaan hogaamiyaal cusub,ama xisbiyada midkood keeno hogaamiye cusub oo aan ahayn kuwa hore u tartamay.

Runtii, hadii shacabka Somaliland inuun rajo ka qabo kobcinta horumarka dimuqraadiyada waxa dalka iyo dadkuba u baahanyinn Isbedel dhab ah, sidaana waxa laga fili karaa musharax cusub,hab-fikirkiisuna ku jihaysanyahay
isbedel siyaasadeed,dhaqaale iyo dhaqan.

Ramadaan kariim.
 

Hussein Badmah
hargeyawi2001@yahoo.de