Cadawga ugu weyn ee
Somaliland waa Somalia waana in la iska jiraa
oo loo fiirsadaa, Gudoomiyaha UCID
Guddoomiyaha xisbiga mucaaridka
ah ee UCID, Eng. Faysal Cali Waraabe, ayaa sheegay in cadowga kowaad
ee madax banaanida Somaliland ka soo horjeedaa ay yihiin Somaalid.
Waxa kale oo uu sheegay in dadka reer somaaliland ay yihiin dad
hurda oo aan u soo jeedin ilaalinta nabadgalyada,islamarkaana dadka
ajaanibka ah ayaynaan iska aaminin oo aynu si adag isaga baadhno
markay madaarada iyo meelaha kale dalka ka soo galayaan.
Guddoomiyaha UCID, wuxuu sidaasi ka sheegay Mar uu maanta kormeer ku
tagay Madaarka caalamiga ah ee Cigaal International iyo cisbitaalka
guud ee Magaalada Hargeysa.
“ waxaa la leeyahay dadkii wax qarxiyay waxay ka soo dageen madaarka,
waxaad ogaataan in cadowgeena koowaad uu yahay Soomaali, cadowgeenu
ma aha Xabashi iyo Kukuuyo, balse kuwaas inoo eeg eeg horena diirka
inooga saaray ee intay Guryaheena inaga saareen dadkeeniina isku
xidh-xidhay , ayaynu iska ilownay waar sowkii shalay uun ina dilayay
waa kii uun’e miyuu is bedelay.”Ayuu yidhi Guddomiyaha UCID.
Guddoomiyuhu wuxuu sheegay inay dadka Somaalida qaarkood laga
dhaadhiciyay in Somaliland Gaallo tahay,waxaanu yidhi “Qaar baa
marka quraanka la barayo ee ay Al-Xamdu marayaan lagu yidhaahdaa
Somaliland waa Gaallo, waxaan leeyahay kooxahaasi u tagi maynee
ilaahay qaar ka shar badan ha ku salido.”
Guddoomiyaha UCID wuxuu sidaasi ka sheegay Mar uu maanta kormeer ku
tagay Madaarka caalamiga ah ee Cigaal International iyo cisbitaalka
guud ee Magaalada Hargeysa.
Eng. Faysal Cali Waraabe, oo la hadlayay masuuliyiinta iyo
Hawl-wadeenada Madaarka Hargeysa, wuxuu yidhi “Madaarka waxaad u
baahan tihiin meelo sida Tarajayga u samaysan lagu soo wareejiyo
madaarka, waxaanad u baahan tihiin rag khabiiro ku ah ilaalada
madaarada ogaadana in meelaha ay ku hamiyayaan ay ka mid yihiin
Madaarada dalku.”
Eng. Faysal Cali Waraabe, wuxuu hawl wadeenada Madaarada kula
dardaarmay inay xil weyn iska saaraan sugida ammaanka dhabada
diyaaradaha.
Sidoo kale, Guddoomiyuhu wuxuu booqday cisbitaalka guud ee magaalada
Hargeysa, halkaasi oo soo eegay dadkii ku dhaawacmay sadexdii qarax
ee is miidaaminta ahaa ee ka dhacay Magaalada Arbacadii todobaadkii
hore, waxaanu dadkii dhaawaca ahaa uu ilaahay uga baryay inuu
shaafiyo.
Qarannews
|