Cabdiraxmaan Aw Cali Faarax ( Laba Tolle )  Oo Kulan Qarsoodi Ah Qasriga Madaxtooyada Somaliland Kula yeeshay Madaxweyne Rayaale
 

Cabdiraxmaan Aw Cali Faarax ayaa habeenimadii Salaasada ee ay arbacadu soo galaysay kulan albaabadu u xidhan-yihiin kula yeeshay qasriga Madaxtooyada Madaxweynaha Somaliland Md. Daahir Rayaale Kaahin.

Sidaa waxa shabakada wararka ee Hadhwanaagnews.com u xaqiijiyey ilo lagu kalsoon yahay oo u dhuun daloola Qasriga Madaxtooyada.

Kulankan oo ahaa mid albaabadu u xidhan yihiin ayaa la sheegay in uu socday muddo sacado ah, mana cada waxay Madaxweyne Rayaale iyo Cabdiraxmaan Aw Cali kaga wada hadleen kulankaasi.

Hase ahaatee, Kulankan ayaa ku soo beegmay wakhti khilaaf-weyni soo kala dhexgalay Xisbiga Mucaaridka ah ee KULMIYE, isla markaana ay jiraan tuhuno badan oo laga qabo in Garabka uu hogaaminayo Cabdiraxmaan Aw Cali Faarax ay taageero kala duwan ka heleen, Xukuummada Madaxweyne Rayaale, si loo burburiyo Xisbiga KULMIYE, iyada oo sida la sheegay Cabdiraxmaan Aw Cali markii khilaafka Kulmiye soo baxay uu ku hanjabay in ay isku raas yihiin Madaxweyne Rayaale.

Ma jiro war rasmi ah oo ka soo baxay waxay labada dhinac kulankaasi kaga wada-hadleen, Hasayeeshee waxa ay ilahaa xog-ogaalka ahi tilmaameen inay labada dhinac kulanka ay yeesheen kaga wada hadleen in lagu lafa-gurey natiijadii iyo khilaafkii ka soo baxday Shirkii Golaha Dhexe ee Xisbiga Mucaaridka ah ee KULMIYE ee dhawaan Burco ka ka dhacay ee lagu doortay hogaanka Xisbiga KULMIYE uga qeybgalaya doorashada Madaxtooyada ee la filayo inay dalka ka dhacdo bisha April 2009 ee fooda inagu soo haysaa, ay sharci-darro ahayd.

Sidoo kale, Kulankan ayaa ku soo beegmay xili ay maalmihii la soo dhaafay hakad galeen wadahadaladii turxaan bixinta ee Xisbiga KULMIYE ee la doonayey in lagu soo af-jaro khilaafkii ka dhashay Shirkii Golaha Dhexe ee Md. Axmed Maxamed Maxamuud [Siilaanyo] iyo C/raxmaan C/laahi Ismaaciil [C/raxmaan Saylici] ay u doorteen musharixiinta rasmiga ah ee Xisbiga Mucaaridka ah ee KULMIYE uga qeybgalaaya doorashada Madaxweynaha ee la filayaa inay dalka ka dhacdo bisha April ee 2009 fooda inagu soo haysa.

 

Source:Hadhwanaag