Booliska Hargaysa oo
Gacanta ku Dhigay Shan Nin iyo 2 Gaadhi
Ciidanka booliska ayaa maanta
duhurkii gacanta ku dhigay shan nin iyo laba gaadhi oo lagu
xidhiidhinayo qaraxyadii dadka badan ku dhinteen ee Arbacadii ka
dhacay magaalada Hargeysa.
Sida ay caddeeyeen saraakiisha booliska Saldhigga ee Dalloodho afar
ka mid ah raggaas ayaa laga qabtay guri ay deganaayeen oo ku yaal
xaafadda Cabbaaye, kaas oo la sheegay in ay dhowaan ku iibsadeen
lacag gaadhaysa $35 kun doollarka Maraykanka, halka ninka shanaad oo
isla gurigaas deganaa uu ka cararay booliska isagoo watay baabuur
yar oo noociisu yahay Grande, isla markaana aannu mar qudha istaagin
xataa markii ciidammadu rasaas dulmariyeen, iyadoo ay waqtigaas
waddada marayeen dadweyne tiro badan.
Dad goob-joogayaal deggan xaafaddaas ayaa caddeeyey in boolisku
gurigaas ka soo saareen xidhmooyin waraaqo ah iyo laba shandadood
kuwa yaryar ah, balse aan la garanayn waxa ku jira, iyadoo
ciidammada ammaanku hadda gacanta ku hayaan shanta nin iyo labada
baabuur ee loo tuhunsan yahay in ay ku lug lahaayeen weerarradii
argagixiso.
Waa markii ugu horreysay ee ciidammada boolisku gacanta ku dhigaan
cid lagu xidhiidhinayo qaraxyadii khasaaraha badan dhaliyey ee
Arbacadii toddobaadkan gilgilay caasimadda Hargeysa.
Keyse A. Digaale,
Togdheernews Hargeysa
|