Biriij Laga Hirgelinayo
Meel U Dhaxaysa Labada Degmo Ee Gacan Libaax
Iyo Maxamuud Haybe Ee Caasimada Hargeysa
Biriij nooca jiifa ah [Irish
Bridge] ayaa maanta laga bilaabay dhismhiisa dooxa u dhaxeeya
degmooyinka Gacan libaax iyo Maxamuud Haybe, si ay u fududaato isku
gudubka dadweyanaha iyo gaadiidka caasimada Hargesa.
Xafladii loo sameeyay bilowga dhismaha biriijkan waxaa ka soo qeyb
galay Maayarka caasimada Hargeysa Eng Xuseen Maxamuud Jiciir iyo
masuuliyiinta shirkada qaadatay dhismaha biriijka ee Daryeel,
masuuliyiin ka tirsan maamulka dawlada Hoose, dadweynaha labada
degmo ee Maxamuud Haybe iyo Gacan-libaax iyo weftigii ka socday
Ganacsatada Shiinaha ee booqashada ku joogga dalka.
Duqa Hargeysa Eng Xuseen Maxamuud Jiciir, oo xafladii bilowga
dhismaha biriijkan ka hadlay ayaa sheegay inuu dhismahani wax weyn
ka tari doono dhibaatooyinka waddo xumida ee caasimada Hargeysa isla
markaana ay gaadiidka iyo shacbiga labadaasi degmo u sahli doonto
inay isu gudbaan, oo ay meesha ka saari doonto waddadii wareega
ahayd ee ay mari jireen.
Eng. Jiciir wuxuu sheegay in dhismaha biriijkan ay iska kaashadeen
dadweynaha labada degmo ee Maxamuud Haybe, Gacan-libaax iyo dawlada
hoose ee Hargeysa. "Waxaan u mahad celinayaa dadweynaha labadan
xaafadood ee ka qeyb galay bixiyeyna qaadhaanka lagu dhisayo
bariijkan oo ah nooca jiifa ee loo yaqaano Irish Bridge."
Duqa caasimadu waxa kale oo uu sheegay in biriijyo noocan oo kale ah
ay ka hirgelin doonaan degmooyinka kale ee caasimada Hargeysa.
Sidoo kale, waxaa xafladaasi ka hadlay qaar ka mid ah waxgaradka
labadaas degmo ee biriijka loo dhisayo oo maamulka dawlada Hoose ku
amaanay hirgelinta biriijkan, oo ay sheegeen in baahi weyn loo qabay.
Ramaasnews
|