BAAQ TAAGERO GO'AANKA XISBIGA UCID EE KU WAJAHAN SOCDAALKA MADAX DHAQMEEDKA SOOMAALIYA

"YAA AYUHA LA DIINA AAMINUU LA TATAWALUU QOWMAN QADIBA ALLAAHU CALAY HIM QAD YA'ISUU MINA AL-AAKHIRATI KAMA YA'ISA AL KUFfAARU MIN ASXAABI IL-QUBUURI." (Al-Mumtaxinah, Al aayah:13)


Dhammaan taageerayaasha laamaha Xisbiga UCID ee Waqooyiga Ameerika waxay si buuxda u taageerayaan go'aanka iyo mowqifka geesininamada ee hoggaanka Xisbiga UCID ku dhawaaqay ka kadib markuu Xisbiga UCID shir la yeeshay madax dhaqmeedka Xamar ka soo kicitimay ee xukuumada dalka ka talisaa sida qarsoodi ah dalka ku soo gelisay iyada oo uga dan leh in ay mad madow iyo shaki cawaaqib xumo abuura bulshada ka dhex aloosto.

Waaxa xaqiiqo ah in xukuumadda talada dalka haysaa marnaba daacad ka ahayn qadiyadda madax-bannaanida, jiritaanka, iyo gooni isutaaga Somaliland. Waxa maanta caddaatay in xukuumadda Somaliland shilimaad dhaafsanayso masiirkii ummaddan.

Xukuumadda Somaliland iyo Xisbul-xaakimeeduba ha ogaadaan in halgankii qadhaadhaa
ee dib u xoreynta sinaba loogula gorgortami karin hindisey rakhiisa ah oo u dabada ka riixayo Xaakimka ka taliya Soomaaliya ( Sir Nicholas Kay), gacan-yarihiisa Xasan Culusow, iyo dawladaha shisheeye ee mashruucan maal-gelinaya.

Mashruucan mala awaalka ah waa mid lagu majar-habaabinayo aragtida beesha caalamka ee ku wajahan dib u soo noolaynta dalkii hore loo odhan jiray Soomaaliya ee 1991 haligmay.

Xukuumadda uu hoggaanka ka madaxweyne Axmed Maxamed Maxamuud iyo Xisbiga Kulmiye waxa anu cod dheer ugu sheegaynaa in ay si deg deg ah ummadda xilka u igmatay ugu caddeeyaan sababta keenta xiligan in ay dalka ku soo hoggaamiyaan madax dhaqmeed Soomaaliya ka soo jeeda oon ujeedadooda ummadda loo sheegin.

Tan ay maanta xukuumaddu ku kacday waa khiyaamo iyo bar madow oo sooyaalka taariikda geli doonta; waa magac xumo aan maanta ka horow la arag lana filayn.

Mashruucan dib-u-soo-noolaynta Soomaaliya waxa hore ugu hawlanaa nin la odhan jirey Donald Payne oo ka tirsanaa Golaha Wakiilada dalka Mareykanka. Bishii December, 2009 ayuu Md. Axmed Maxamed Maxamuud Md. Payne kula kulmay magaalada Washington D.C. Bishii June, 2009 shir u mudanahaasi ku qabtay Washington Xukuumaddii madaxweyne Md. Dahir Riyaale Kaahin ganafka ayey ku dhufatay oo Wasiirkii Arrimaha Dibada ee xiligaa Md. Cabdillaahi Maxamed Ducaale si badheedh ah ayuu yidhi annaga shirkaasi nama khuseeyo. Bal isweydiiya sababta keentay in xukuumaddaynu u codeynay la shir timaado arrimo lid ku ah waxaynu 23 sanadood ku tabcaynay ee naf iyo maalba loo huray in maanta abaalkii ummaddu noqday is dhexyaacii hore loo eeday ayaa dib loo abqaalaya!!

Xukuumadda Somaliland ha ogaato in aanay haba yaraatee suurtoobayn Soomaaliya oo dib wax loo wadaago. Hadday ummaddo u soo bandhigi weydo qorshan innamda yar yar ee socod baradka ihi horboodayaan, Maydaan-ul Taxriir wuu furyahay oo gugii keli-talisyadii Carabeed galaaftay ay dalka ka curandoonee ku bushaareysta.

Waxan ku soo gunaanadayaa ayaadan Qur'aanka ah in kastoo qowmkan aynu arkayno Qur'aan iyo xadiis midna ka degeyn:

"YAA AYUHA LA DIINA AAMINUU LA TATAWALUU QOWMAN QADIBA ALLAAHU CALAYHIM QAD YA'ISUU MINA AL-AAKHIRATI KAMA YA'ISA AL KUFfAARU MIN ASXAABI IL-QUBUURI." (Al-Mumtaxinah, Al aayah:13)


Axmed Cali Ibrahim Sabeyse
Guddoomiyaha Xisbiga UCID- Canada