“Madaxweyne Rayaale Waa Khaayinul-wadan, Waa in Maxkamad
LaHorgeeyaa,Waa in Halka Uu Ku Jiro Laga Soo-Saaro Oo La Tuso..”
Ismaaciil-Yare.
Wasiirkii hore ee Wasaaradda
Arrimaha Gudaha Somaliland Ismaaciil Aadan Cismaan (Ismaaciil-yare),
ayaa Xukuumadda Madaxweyne Rayaale ku eedeeyay, in ay Isniintii
todobaadkan doonaysay in dalka isku dhac beeleed iyo dagaal sokeeye
ka dhaco, ka dib markii ay Ciidamo Boolis ah dul-dhoobtay Xarunta
guud ee Xisbiga KULMIYE ku leeyahay Magaaladda Hargeysa, halkaas oo
lagu xusayay 28-guurada ka soo wareegtay maalintii la aasaasay
Ururka SNM 6-dii April, sidaa daraadeedna, ay Hogaanka Sare ee
KULMIYE halkaa Khudbado uga jeedinayeen Taageerayaal tira badan oo
Munaasibaddaas ka soo qaybgalay, hase ahaatee, markii ay dadkaasi
soo dareereen si ay Guddoomiye Axmed-Siilaanyo ugu soo gelbiyaan
gurigiisa ay Ciidamadu Rasaas ku kala reebeen Hogaanka Xisbiga iyo
dadkii gelbinayay.
Wasiirkiii hore ee Arrimaha Gudaha Ismaaciil-Yare oo ahaa Wasiirkii
ugu horeeyay ee Xukuumadda Daahir Rayaale ka tirsan ee dad
Mudaharaadaya Xabsiga u taxaaba, ka dib markii Rayaale intii la
doortay khudbaddiisii ugu horeysay ee 18-ka May si aan dadweynaha
qaarkood jeclaysan uga hadlay Khayriyada Magaaladda Hargeysa, taasoo
ay dadkii ka biyo-diiday khudbaddaas Foodhi iyo qaylo ku sagootiyeen
Madaxweynaha, isla markaana socod ku mareen qaar ka mid ah
waddooyinka Caasimadda Hargeysa. Hase ahaatee, Ismaaciil Aadan
Cismaan (Ismaaciil-Yare) oo wakhtigaa ahaa Wasiirka Daakhilga, inta
la ogyahay waxa uu Xabsiga u taxaabay Dhalinyaro reer Somaliland ah
oo tiradoodu boqol ku dhawayd, ka dib markii ay muujiyeen qawadka
khudbadda Rayaale xiligaas jeediyay.
Hasa-yeeshee, Ismaaciil-Yare, oo maanta u waramayay qaar ka mid ah
Warbaahinta Madaxa-banaan ee Somaliland, waxa uu ku dooday in
faraqwayni u dhaxeeyay Mudaharaadkaas khudbadda Madaxweyne Rayaale
lagu saluugay iyo ka wakhtigan KULMIYE sameeyay oo uu sheegay inaanu
Mudaharaad ahayn. “Maalintan dhawayd ee la leeyahay mudaharaad baa
la dhigay, muu ahayn mudaharaad, waa been, dacaayado ayaa lagu
samaynayaa oo laga fidinayaa. Waxay ahaayeen dadkii taageerayaasha
Xisbiga KULMIYE ee dhagaysanayay khudbadaha Madaxdooda, oo doonayay
in ay raacaan Guddoomiyaha iyo Madaxda kale ee Xsbiga KULMIYE oo ay
halkaa ka tagaan Guriga Guddoomiyaha.
Markii ay soo mareen dariiqa iyada oo Ciidankii Boolisku hareeraha
ka socdo, oo wax dhagax-tuur ah iyo wax rabshad ahi toona aanay
jirin, ayaa Ciidamo gaar ah oo waliba dhinac qudha ah oo marka
Qabiilka laga eego aad moodo in dad loo sii diyaariyay oo gaadhi ka
buuxaa ka horyimaadeen. Dabadeedna iyaga oo aan waxba waydiin ayay
dadkii Rasaas ooda kaga qaadeen.” Sidaa ayuu yidhi Wasiirkii hore ee
Daakhiligu Ismaaciil-Yare.
Ismaaciil Aadan Cismaan (Ismaaciil-Yare), mar uu ka hadlayay
qorshaha ay Xukuumaddu ka lahayd Ciidamada ay dul-dhoobtay Xarunta
guud ee Xisbiga KULMIYE, waxa uu yidhi, “Markaa waad garan kartaan
in dawladdu qorshaysay in ay shacabka isku disho oo ay Madaxa isu
geliso, sida ay Ciidamadii Booliska u kala qayb qaybinayso, oo cid
gaara hawlahaasi loogu dirayo, si ay dhibaato u gaystaan oo dadku u
damqado. Daahir Riyaale Daahir Riyaale maaha Madaxwayne ee waa
khaayin wadan khiyaameeyay wadanka oo wixii loo soo doortay iyo
wixii loo soo dhaariyayba ka baxay oo Somaliwayn wax la saxeexday oo
doonaya in uu dadka meel kale ku darro oo inta Sheekh Shariif uu
dabada dhulka dhigayo ee Al-shabaab ka adkaysanayo kaliya sugaya
weeye, oo waliba dawladdo aan garanayo oo aanan iminka halkan ka
sheegayn intaa talada la haya oo talefoono kula soo xidhiidhayaan,
markaa waa nin heshiis soo galay, waa wax dhab ah.”
“Madaxweyne Rayaale, Waa Khaayinul-wadan, Waa in Maxkamad Lageeyaa,
Waa in Halka Uu Ku Jiro Laga Soo-Saaro Oo La Tuso la tusaa in aanu
dadka inta uu madaxa isu geliyo aanu ka dhex bixi Karin. Dadkana
waxaan leeyahay dantiina ilaashada. Isu soo baxaas oo ahaa mid salmi
ah oo ay shucuurtooda ku muujinayaan taageerayaasha Xisbiga KULMIYE,
ayaa Ciidamo lala soo hadlay ay yimaadeen, waxa kale oo jira ilaa 3
nin oo waliba nin ay isku sii jilib yihiin Rayaale oo naanaystiisa
lagu magacaabo Banbiida iyo laba nin oo kale oo aan saddexdaba
garanayo anigu oo ka tirsan askarta madaxtooyada, dharkii booliska
ayaa loo soo xidhay ciidamadii Booliskana waa lagu soo dhex-daray.”
Ayuu yidhi Ismaaciil-yare.
Wasiirkii hore ee Arrimaha Guduhu isaga oo hadalkiisa sii wata waxa
uu intaa ku daray oo uu yidhi, “Waayo maxay qabanayeen? Waad
garankartaa in lagu soo dhex daray, waxa laga yaabaa in ay
tooganayeen madaxda xisbiga KULMIYE iyo ragga u sharaxan KULMIYE, oo
marka xabadu bilaabanto haddii laba iyo saddex lagu dhufto xabada
lama garanayo wax dilay, booliska uun baa dilay la yidhaahdo. Dadkan
xabadda loo adeegsanayaa waa’ayo, dadkani waxay ka soo dagaalameenba
waa xabad lala dhaco iyo in qof waliba xoriyaddiisa ku noolaado,
tiina Daahir Riyaale wuu qaaday, wuxuu moodayaa Kaabadahan waawayn
ee shubka ah ee uu is hor-dhigay iyo guriga uu ku jiro; yacnihii
waxa weeyaan wuu garanwaayay milgihii la siiyay.”
Ismaaciil-Yare, waxa uu Madaxweyne Rayaale ku eedeeyay in uu doonayo
inuu dalka burburiyo, waxaana ka mid ahaa hadaladiisii oo uu yidhi,
“Riyaale wuxuu ujeedaa in uu dalka burburiyo oo xaggaana ay Puntland
ka soo gasho oo ay ka soo qabsato, gudahana olol ka kaco, dabadeedna
qorshihiisii Somaliwayn ee uu saxeexay ee uu la galay Sheekh Shariif
ee dhamayska tirnaa uu yidhaahdo waanigaa ku dhawaaqay ee dhameeyay.
Markaa waxa weeye Riyaale dhiigyo-cabnimuu ku darsaday dhurwaagii
aan hore u sheegay, in la iska qabto oo degdeg gacmaha la isu
qabsado ayaana loo baahan yahay.”
Hadhwanaagnews
|