|
Gabanyahaow
da,adaadiyo
muu korin garaadkaa
gurigiina mooyee
xusuusaha ma garansanid
*******
Gaddan aad is leediyo
waxa jira gadaashaa
gantaddii hangoolkiyo
waa faraarki geedkale
midba gooni ugu yiil
*******
Gayigaynu leeniyo
midkaan galabta joognaa
bari iyo galbeedoo
isba gaadhin weeyaan
*******
Waxsen gooha
sheekada
aabo kuugu galaya
inaad gunudo hadalkoo
buugaaga gaariyo
taariikhda galisood
haddii guulle kugu simo
aad gabannadaadiyo
ubadkow garoocdaa
*******
Diinteenu waa guun
galladii illahiyo
islaam gaara baan nahay
sunahaynu gowskiyo
gadaashaa ku haynaa
*******
Salaadaynu gudanaa
sakadaynu gooynaa
soonkaynu garanaa
xajka gudashadiisuma
haddii guulle kuu qoro
waa inaad mar gaadhaa
*******
Ka gudboo intaa idhi
gadaal noqoshadeenuna
waa gooni midabkeen
afrikaan gobaan nahay
goobta ugu qurxoon iyo
gurigii udgoonkiyo
gacamada cadmeed iyo
barbaraad ka galaysaa
*******
Lowga gabal
dhaciisiyo
Herer goonyaheediyo
Gedo iyo wajeer iyo
Barri goonyahiisiyo
Gubadliyo calaydh iyo
inta geed Galool iyo
Gumar lagu yaqaanee
Geeleenu daaqiyo
gayigeenu waa kaa
*******
Goodiga ban cowl iyo
Garanuugle iyo tuban
Ceeri gaabo iyo badhan
Gaashaamo iyo sirow
Gayigeenu waa kaa
*******
Guban iyo in raacdiyo
Buurta gacan libaax iyo
Boorame galbeed iyo
Gabiilay dusheediyo
Guuxaaga sarre iyo
halka laba go,oodliyo
mid garaysli joogtee
lagu raaco guunyada
gayigeenu waa kaa
*******
Afarta gaddaydii
gudbiyoo tilmaamee
aan waanadow galo
Dhaqan aan go,aynoo
ruuxba ruux ka gaadhoo
laysu soo gudbinayiyo
waxa jira ma guuraan
gunto oo ha sii dayn
*******
Gacal iyo xigaal iyo
tolka gurada wayn iyo
xidid aan la goyn iyo
waxa jira xasaba gura
gunto oo ha sii dayn
*******
Sharaf gogol dhigeediyo
gobonimo qadarinteed
gadhwadeenadeediyo
gaadiidka qaadiyo
gurgurshaaga sida noqo
*******
Baahanaha gargaar sii
goobta aad ku kulantaan
hadday gacantu madhantahay
haku gubin odhaahdee
u garwaaqso waayaha
*******
Gafna yaanu kaa tagin
gocashada ha laasimin
midkaad galab is jiidhaan
baritaba salaan gali
hadduu geesta kaamaro
isagay gubaysaa
goonidaa iskaga taag
*******
Garab qabo adoomaha
guulihii ku uuma
ajar kaaga gudayee
guto oo ka sii dayn
Nimcaddana u gogol-xaadh
garro waajibkeedoo
kibir yaanay kula galin
gudbanaha ha gaasirin
*******
Marti galintu waa teer
laynagu galadayoo
guyaal iyo guyaal hore
ummad garasho dheerbaa
abaal guuna sugaysee
marna yay garaadkiyo
madaxaaga gees marin
*******
Maahmaahi gaar tidhi
nin galow ku aragnaye
tallow yaa ku gudi kara
dadaal baana gees furan
gunto oo ha sii dayn
*******
ha ku gubanin jaarkana
xaq u gooniyaa jira
guulaheen jideeyoo
garbihiyo waxaad tiin
gacmahaa sinaadee
gunto oo ha sii dayn
*******
Gaaf-wareega madhan iyo
xilliyada guracanee
gaaduhu u sahan yahay
ka gaboodso kiiniyo
hooyo gacaladaayoo
gadoodiga danbeeyee
bari kula gudboon iyo
aibaabkiyo garaaciyo
isguulkii nabdiga gali
gunto oo ha sii dayn
*******
Taariikhaa gudbaayoo
xilliyaa is gurayee
ha gufaynin dhagahee
godolkeed u yeelow
ha ka gaabin barashada
waa gantaalka kaliyeed
ku dagaal galaysaa
gunto oo ha sii dayn
*******
Hawaduna gad kale timi
cadceedii ku gubaysee
geedka laga hadhsanayiyo
maaha dhididki gobolaa
*******
Waa qabow ku galayiyo
baraf aan go,ayn iyo
dhibic goorna wadan iyo
dabaylaha gilgilayee
wadnu kula gariiriyo
dhaxan gaydhle oo daran
*******
Gaashaanku waa huga
hadba laga gashanayee
gunto oo ha sii dayn
gowgowda hadalkiyo
midka geedi dheer taga
gaabsigaa ka khayr roon
gunto oo ha sii dayn
*******
Geda socodka liicliic
garan waa sidiisii
hadba garab ha tuurine
gaashaan-qaad sidiisii
gaardiga ku laafyood
*******
Timahana gadaal hore
sida geed ha yeeline
taaloog ku gowsii
gadhfeedhana in teed reeb
hugan laysku giijiyo
midkan layska gurayee
miskihiiba gaadhayn
inta qurux u garataa
*******
Goblan weeye yimiyoo
dhaqankoodi gudhiyee
waad garan astaantii
huga loo gashanayee
gunto oo ha sii dayn
runta gogol dhigeediyo
gaashaanka samihiyo
geesinimadi yay lumin
*******
Beenta kala gurkeediyo
raad gaabnideedanna
duco qabe ma gaynee
waa gamaan magaanoo
orod geesa bixinoo
kula gaabinaayoo
dirir laguma gali karo
*******
Waxa aan ku gaabsaday
gabaygiina kaga baxay
duco aan go,ayn baan
guule kuu baryaayoon
gacmahana u fidiyaa
aqbalkana gadiisii
guusha waan ka filayaa
*******
Geesiyaasha joogiyo
guurtiday maqlaysaay
aamiinta ila gura
Rabow aanad goob daran
gabayooxsan waaqliyo
meel gacal ka dheer yahay
*******
Allow kuu gargaaroo
khaatumo ku garansii
Rabow guusha samihiyo
khayrkaba ku gaadhsii
Rabow goolka nololeed
geestuu u qaadaba
uu libin ka gaadhaa
*******
Allow guri barwaaqiyo
gayi lagu nabdoonyiyo
nimcadaba ku gaadhsii
Rabow guur hagaagiyo
marwo aan gubayn iyo
gaari lagu samaadiyo
dhabeel goonya haysiyo
*******
qaryad garasho dheer iyo...[qaryad]waa haween ta ugu
sidata
*******
Aqal gurada buuxdoo
gabaniyo hablaba badan
fadligaaga gaadhsii
|
