“C/Laahi Cirro,
Saqadhi Iyo Warancade Waa Niman Aqoon Badan U Leh Baadhista
Dambiyada Iyo Sirdoonka, Waa In La Hawl Galiyaa, Muuse Biixi
Laftiisu………”
“Warbixintii Guryaha La Gubay Ay Ka Bixiyeen Wasiirka Arimaha Gudaha
Iyo Taliyaha Ciidanka Boolisku Waxaan U Arkaa Mid Wayd Ah, Oo Aan La
Qaadan Karin"Suldaan Maxamed Suldaan C/Qaadir
Hargeysa, February 28, 2011 (TNN) – Suldaanka Guud ee Beelaha
Somaliland Suldaan Maxamed Suldaan C/qaadir ayaa sheegay inuu
aaminsan yahay in laga talo galiyo sugida amaanka dalka Wasiirkii
hore ee Arimaha Gudaha C/laahi Ciro, Wasiirkii Duulista & Hawada
Warancade, Taliyihii hore ee Bileyska Saqadhi iyo Guddoomiyaha
Xisbiga Kulmiye Muuse Biixi Cabdi oo uu ku tilmaamay inay wax badan
ka qaban kari lahaayeen Amaanka Caasimada Somaliland ee ka sii
daraya.
Suldaanku waxa kale oo uu dhaliil weyn u soo jeediyey Warbixinadii
isburinayey ee guryaha la gubayo ay ka bixyeen Wasiirka Arimaha
gudaha Dr Maxamed Cabdi Gaboose iyo Taliyaha Bileyska Cilmi Rooble
Fure (Cilmi Kabaal) oo uu ku tilmaamay warbixino wayd ahaa oo aan la
qaadan Karin.
Suldaanka guud waxa uu sidaasi ku sheegay Waraysi Khaas ah oo uu
xalay khadka Telefoonka ku siiyey Wargeyska Haatuf, Suldaanku ugu
horayn isaga oo ka hadlaya Masuuliyiintaasi uu magac dhabay waxa uu
yidhi “Inkasta oo xukuumadda iyo Madaxwaynuhuba xor u yihiin kala
doorashada shakhsiyaadka bulshada u adeegaya, hadana anigu waxaan
aaminsanahay inay dhacdooyinkan foosha xun ee dalka ka socda ay wax
weyn ka tari lahaayeen masuuliyiin ay ka mid yihiin wasiirkii hore
ee arimaha gudaha C/laahi Ciro, Taliyihii hore ee ciidanka Bileyska
Saqadhi iyo Cali Warancade, dhamaantood waa niman arimaha la ogaan
layahay maanta wax weyn ka tari lahaa. C/laahi Ciro isagu waxa uu
khabiir ku yahay baadhista danbiyada aan la garanayn cida samaysay,
C/laahi Ciro waxan aynu garan lanahay iyada oo aan la samayn ayuu
heli jiray, oo kuwa u soo waramayaa iyaga oo aanay waxba ogaan wali
ayuu isagu ka hor heli jiray, runtii waa nin in badan nabad sugida
iyo baadhista dhacdooyinka noocan ina haysta ah ka soo shaqayn jiray,
waana nin in badan ka soo shaqaynayey arimaha baadhista dambiyada
iyo sirdoonkaba, markaa waxaan soo jeedinayaa ha laga qayb galiyo
talada dalka, waana in aan loo eegin xisbi Mucaarid ah ayuu ka
tirsan yahay ee waa in lagu qiimeeyaa waxa uu ummadda u qaban karo,
imika taliyaha Bileyska anigu mar hore ayaan sheegay in Saqadhi nin
kaga haboon ciidanka Bileyska iyo ka hortaga danbiyada aanu jirin”.
Suldaanka guud ee Beelaha Somaliland Suldaan Maxamed Suldaan C/qaadir
Waxa uu intaasi ku daray oo uu sheegay in guddoomiyaha Xisbiga
Muxaafidka ah ee Kulmiye Muuse Biixi Cabdi laftiisu uu wax weyn ka
qaban karo amniga caasimada dalka ee Hargeysa ee loo maaro layahay,
waxaanu Suldaanku yidhi isaga oo arimahaasi ka hadlaya “Guddoomiyaha
Kulmiye laftigiisa Muuse Biixi waa nin wax weyn ka qaban kara amniga
caasimada ee loo maaro layahay, markaa waa in aynu ka shaqaysiinaa
dadka aqoonta u leh baadhista danbiyada. Masuuliyiintii amniga ee
Rayaale waxay ahaayeen niman xidhiidh badan leh oo meel walba lagala
soo hadli jiray oo meelkasta ciddi u joogto, markaa haddii
shaqsiyaadka noocaas oo kale ah la hawl galiyo cadawgeena waynu ka
aarsan karnaa”
Suldaan Maxamed Suldaan Cabdiqaadir ayaa sidoo kale mar uu ka
hadlayey Guryaha la gubayo ee caasimada saddexdii todobaad ee ugu
dambeeyey iyo sida uu u arko hadalada ay ka bixyeen masuuliyiinta
Dawladda Siilaanyo ayaa waxa uu yidhi “Warbixintii Guryaha la gubay
ay ka bixiyeen Wasiirka Arimaha gudaha iyo Taliyaha Ciidanka
boolisku waxaan u arkaa mid wayd ah, oo aan la qaadan karin, run
ahaantii waxa wax laga xumaado ah in xaafad dhan oo dhawr iyo
labaatan guri laga gubay in la yidhaahdo iyagaa iska gubaya
guryahooda waa hadal aan macquul ahayn, masuuliyiintan hadalka
keenay gadoodka shacbiga waxa fiicnayd inay hawlahooda u hagar
baxaan oo ay ka shaqaysiiyaan sirdoonka iyo hay’adaha amniga ee ku
shaqadda leh falalka noocan oo kale ah, waxaana u wanaagsan in aanay
shacbiga ka cadhaysiin, si ay u fududaato in ay warar xaqiiqo ah
helaan, maxaa yeelay shacbigu waa kuwa hirgalinaya amniga marka ugu
horaysay haddii aanay ciidamada iyo hay’adaha amniga la shaqayna
waxba uma suurtoobayaan”.
“Hadalka wasiirka iyo taliyuhu ay iska daba qaateen ee ay leeyihiin
laba guri oo kaliya ayaa daaro ah, waa hadal u eeg kicin shacbi,
sababta oo ah maaha in bulshada indhaha la qabto, waxa aynu wada
aragnay in guryo badan oo ka mid ah guryahaa la gubay ay ahaayeen
daar, markaa waa in ay masuuliyiinta qaranku u meel dayaan
hadalkooda, marka ay leeyihiin dadku iyaga ayaa guryahooda gubaya,
waa hadal afgobaadsi uun u eeg, ee aan ahayn xaqiiqo jirta, mana
jirto meel aduunka lagu arkay dad iyagu guryahooda guba. Dadka u
haysta in Somaliland ay wax yeelayso guryan la gubay waxaan u
sheegayaa Somaliland guryo la gubay ku kala dhaqaaqi mayso, ee
shacbigu iyagu nabad galyadooda ha ilaashadaan, awalba iyaga ayaa
samaystay horumarkan iyo amniga maanta Somaliland ku caano maashay”.
Suldaan Maxamed mar uu ka hadlayey qaar ka mid ah dadka loo xidh
xidhay guryaha la gubay, isla markaana sheegay in uu ku jiro nin uu
aqoon fiican u leeyahay, oo xanuunsanaya, sadex cishona ku xidhan
saldhiga dhexe, waxa uu yidhi “Dadkan la leeyahay waxa loo qab
qabtay guryaha la gubay, waxa ku jira nin aanu habra-wadaag nahay oo
kalyaha laga qalay,aqalkiisiina la gubay, isaga oo xanuunsanaya ayuu
imika sadex habeenba saldhiga ku xidhan yahay, maaha in la yidhaahdo
adigaa aqalkaagii gubay, ninkan xidhan ee ay leeyihiin gurigiisii
ayuu gubay waa nin masuul qaran ah oo aanay waxaas ka suurto galin,
markaa xukuumadda waxaan u soo jeedinayaa in aanay dadka iska xidh
xidhin ee ay ka fiirsato ninkaasna xoriyadiisii u soo celiso”.
Suldaan Maxamed Suldaan C/qaadir mar uu ka hadleyey fadhigii golaha
wakiilada ee doraad uu wasiirka arimaha dibadu ku hortagay iyo sida
uu u arko, waxa uu yidhi “Waxaan aad u soo dhawaynayaa sidii
caaqiibada lahayd ee wasiirka arimaha dibadu uu shalay ula hadlay
xildhibaanada wakiilada,waxaana guusha uu gaadhay cadanaysa sacabkii
madasha laga tumayey, anigu waxaan odhan karaa runtii waa nin dar
dar cusub ku soo kordhiyey siyaasada arimaha dibada Somaliland, waxa
diblomaasiyada wasiirka khaarajiga cadaynaya 16-kii safiir ee uu
dalka keenay, wali may dhicin 20-kaa sano ee aynu jirnay inay
yimaadaan wafti meeqaamkaa leh, runtii waxaan odhan karaa siyaasada
arimaha dibadu hada ayey dhabadii horumarka iyo guusha martay,
waanan soo dhawaynayaa shirkii London ee uu ka qayb galay, waxaan
hubaa in uu wasiirkaasi yahay nin dublamaasiyada aqoon xeel dheer u
leh”.
Mar uu ka hadlayey suldaanku sida uu u arko baraakaha Kalshaale ee
la aasay, waxa uu yidhi “Shacbiga ka qayb qaatay iyo xukuumaddaba
waxaan ku hambalyeynayaa talaabadii lagu fuliyey amarkii
madaxwaynaha ee ahaa in aaso baraakaha Kalshaale, waxaanan
xukuumadda leeyaha ummada ku dhaqan Buuhoodle deegaanada Sool waa in
la soo dhaweeyaa oo waxay tabanayaan la waydiiyaan, sababta oo ah
Dhulbahante waa dad reer Somaliland ah, waana in gogoshii
madaxwaynuhu fidiyeyna si dhab ah loo fuliyo oo beelaha walaalaha ah
ee markii hore dirirtu dhexmartayna ay wada hadal arimahooda ku
dhamaystaan”.
Mar uu ka hadlayey sida uu u arko hadalkii madaxwaynaha maamulka
Garoowe Faroorel, waxa uu yidhi “Madaxwaynaha Puntland xaq uma laha
in uu Somaliland soo faro galiyo, maxaa yeelay isagu waxa uu
aaminsan yahay Fadaraal, Somalilan-na waa dal xor ah oo
xornimadoodii la soo noqday 1991-kii, markaa maaha-ba inay wax aan
ahayn daris wanaag iskugu yimaadaan, anigu waxaan qabaa Faroole
shacbigiisu lama qabaan in uu fidmo ka dhex abuura Somaliland,
sababta oo labada shacbi waxa ka dhexeeya xidhiidh dhinac badan ah,
haday xaga ganacsiga noqon lahayd iyo haday xag walba noqon
lahaydba”.
Source:Haatuf
|