Md.Axmed Yuusuf
Yaasiin oo ka soo laabtay Safarkiisii Jabuuti
Madaxweyne ku-Somaliland Axmed
Yuusuf Yaasiin,ayaa maanta dalka dib ugu soo laabtay ka dib markii
uu soo
dhamaystay Safar muddo todobaad ah qaatay oo uu ku tagay Magaaladda
Jabuuti ee Xarunta Jamhuuriyadda Jabuuti.
Safarkan Md.Yaasiin ku tagay Jabuuti ayaa hawlo Caafimaad la
xidhiidhay,haseyeeshee intuu uu halkaa joogay ayaa waxa uu sheegay
Madaxweeyne Ku-xigeenku inuu kulamo la yeeshay Madaxda sare ee
dawladda Jabuuti.
Md.Axmed Yuusuf Yaasiin, oo qolka nasashada ee Garoonka Diyaaradaha
Warbaahinta ugu waramay ayaa sheegay in ay dawladda Jabuuti ka
wadahadleen sidii ay labada dal isaga kaashan lahaayeen xakamaynta
iyo ka hortagga Budhcad-badeedda ka ugaadhsada Xeebaha Somaliya iyo
qayba kale oo Badweynta ka mid ah.
Md. Yaasiin, waxa uu sheegay in Jabuuti uu u tagay xaalad
caafimaadkiisa la xidhiidha, wakhtigana Caafimaadkiisu aad u fiican
yahay, inkasta oo aanu sheegin dhibaatada caafimaad ee uu halakaas u
taga.
“Dabcan hawsha Caafimaad ka sokow, Dawladda Jabuuti waxaanu ka
wadahadalay Kooxaha Budhcadbadeedda Soomaalida ah ee faraha baas ku
haya Xeebaha Somaliya iyo Biyaha Cadmeed sidii ay labada dal ee
Somaliland iyo Jabuuti isga kaashan lahaayeen.” Sidaa ayuu yidhi
Madaxweyne Ku-xigeenka Somalialnd Axmed Yuusuf Yaasiin. Hase ahaatee,
si cad daaha ugama rogin waxyaabaha ay Madaxda dalkaasi isla soo
qaateen.
Madaxweyne Ku-xigeenka, oo maanta ka soo degay Madaarka Caalamiga ah
ee Caasimadda Hargeysa, ayaa waxa soo dhaweeyay Wasiirada Arrimaha
Gudaha, Madaxtooyada iyo Taliyaha Ciidamada Booliska Somaliland.
Safar kan Madaxweyne Ku-xigeenka Somaliland ka kaga soo laabtay
Jabuuti oo ah kii ugu horeeyay ee intii uu xilka hayay ku tago
dalkaas, ayaa qaatay muddo todobaad ah, waxaana ku wehelinayay
Wasiirka Dhaqanka iyo Dalkiisa Cabdirisaaq Waabari Rooble, iyada oo
Safarka Axmed Yuusuf Yaasiin uu todobaadkii hore kaga ambabaxay
dalka aan la sii shaacin.
Source: TogdheerNews
|