21 Qoys Oo Caawa Hal
Mar Aroos Wadareed Loogu Qabtay Hargeysa
Shirkada isgaadhsiinta ee TELESOM
ayaa caawa madal la isku arkay 21 ka mid ah shaqaalaha shirkadaasi
Aroos wadareed ugu qabatay Huteelka Maansoor ee magaalada Hargeysa.
Xafladii loo sameeyay aroos wadareedkaasi waxa ka soo qeyb galay
Guddoomiye ku xigeenka koowaad ee Golaha Wakiilada Somaliland Md.
Cabdi-casiis Maxamed Samaale, Wasiiro Xildhibaano ka tirsan
Goleyaasha Baarlamaanka ee Guurtida iyo wakiilada, Abwaan Maxamed
Xaashi Dhamac [Gaariye], Guddoomiyaha Jaamacada Hargeysa, Culimo iyo
dadweyne kale oo lagu soo marti qaaday.
Masuuliyiinta shirkada TELESOM waxay sheegeen in ay 21-ka Qoys ay
midkiiba siiyeen 2 kun oo Dollar, oo ay ku dhigteen agabka Guriga ee
kala duwan, waxaanay sheegeen inay arrintan u sameeyeen sidii ay
dhiiri gelin ugu samayn lahaayeen Hawl-wadeenadooda oo ay u dhisi
lahaayeen Qoysas muslim ah.
Masuuliyiinta shirkadaasi waxay Dhambaalo Hambalyo iyo Duco isugu
jiray u direen 21 kan Qoys oo ay xuseen inay khayr u rajeynayaan.
Guddoomiye ku xigeenka kowaad ee golaha Wakiilada Somaliland Md. C/Casiis
Maxamed Samaale, Xaaji Cabdi Xuseen Yuusuf [C/Waraabe] oo ka tirsan
Golaha Guurtida iyo culimadii xafladaasi ka hadashay waxay shirkadaa
ku ammaaneen tallaabadaasi ay qaaday oo ay ku sifeeyen mid horumar
ah, isla markaana ku dayasho mudan.
Waxaanay shirkadaha kale ugu baaqeen in ay tallaabadan oo kale
qaadaan si ay u dhiiri geliyaan shaqaalaha una dhisaan qoysas
mujtamaca Somaliland ku soo kordha.
Waa Xafladii koowaad ee nooceeda ah ee lagu qabto magaalada Hargeysa
ee ay shirkadi shaqaalaheeda ku dhiiri-geliso.
Ramaasnews
|