Madaxweyne Rayaale Oo
Xalay Qasriga Madaxtooyada Kula Kulmay Saraakiil Ka Tirsanaa
Maamulka Puntland
Madaxweyne Rayaale ayaa xalay
qasriga Madaxtooyada kulan kula yeeshay saraakiisii ciidamada maamul
goboleedka Puntland ee degmada Buhoodle oo maalintii doraad soo
gaadhay magaalada Hargeysa, kadib markii ay ka soo kici timeen
degmada Buhoodle oo la sheegay inuu soo hor kacay wasiir ku xigeenka
wasaarada hawlaha guud C/risaaq Cawil Bacaluul oo isagu muddo bil ah
hawlahaasi ugu maqnaa degmada Buhoodle.
Sida ay ilo xogogaal ah oo u dhuun daloola Qasriga Madaxtooyadu waxa
ay noo sheegeen in Madaxweyne Rayaale xalay qasriga madaxtooyada
kulan kula yeeshay 14 Sarkaal oo ka mid ah saraakiisha ciidamada
Puntland u fadhiyey degmada Buhoodle, kuwaas oo uu hogaaminayey
Taliyihii ciidamada maamul goboleedka Puntland ee degmadaasi kornayl
Maxamed Dhulqaas oo ay xubno ka ahaayeen saraakiishii hoose ee Hubka
gacanta ku hayey, taas oo sida la sheegay Saraakiishan ciidamada
maamulka Puntland ee soogalay Somaliland la sheegay inuu dhex maray
xidhiidh wada hadal oo beryahan dambe uga wada socday wasiir ku
xigeenka hawlaha guuud C/risaaq Cawil Bacaluul iyo saraakiisha
ciidamada jiida Puntland ee fadhiisinkoodu yahay degmada Buhoodle,
taas oo natiijadii wada hadalkoodaasi uu noqday in maalintii doraad
ay casimada Hargeysa soo gaadhaan isla xalayna kulan ay kula
yeeshaan madaxweyne Rayaale qasriga madaxtooyada, kulankaas oo la
sheegay inuu dhex maray madaxweyne Rayaale iyo saraakiishaa Puntland
ee uu hogaaminyey kornayl Maxamed Dhulqaas, ayaa waxa ay tibaaxuhu
noo sheegeen in madaxweyne Rayaale iyo saraakiiishaasi Puntland ay
ka wada hadleen sidii loo qaramayn lahaa ciidan maamulka Puntland oo
ay degmada Buhoodle ku xukumayeen iyaga iyo gaadiidka tiknikada ah
ee ay gacanta ku hayaan taas oo sida ay ilo xogogaal ahi noo
sheegeen ay kulan kaasi isku afgarteen saraakiisha ciidamada
Puntland ka soo galay.
Waxaana ay tibaahxuhu noo caddeeyeen in kulankaasi uu goob joog ka
ahaa wasiir ku-xigeenka hawlaha guud C/risaaq Cawil Bacaluul oo
isagu ka soo jeeda deegaanka Buhoodle, isla markaan ahaa masuulka
xidhiidhka wada hadal la soo sameeyey saraakiisha ciidamada Puntland
ee u soo galay Somaliland, kuwaas oo tiradooda lagu sheegay inay
ahayd 14 sarkaal oo iskugu jira taliyeyaasha ciidamada milateriga
iyo Bilayska ee maamul goboleedka Puntland u jooga deegaanka
Buhoodle.
Qaar ka mid ah saraakiisha ciidamada Puntland ka soo galay oo
maalintii doraad caasimada Somaliland soo gaadhay ayaa iyagu wax
tafaasiil ah diiday inay wargeyska Haatuf ka siiyaan waxyaabaha ay
kulanka kaga wada hadleen madaxweyne Rayaale.
Waxaase tibaaxo ka ag dhaw kulankaasi saraakiisha ciidamada Puntland
iyo madaxweyne Rayaale ay noo sheegeen inay halkaasi saraakiisha
ciidamada Puntland ee uu hogaaminayey kornayl Maxamed Dhulqaas ka
caddeeyeeen inay gabi ahaanba ku soo biireen maamulka Somaliland,
kuwaas oo ka soo baxay maamulka Puntland ee ay ka tirsanaayeen.
Haatuf
|